Putin Ukrainaning barcha shaharlariga hujum qilishni buyurdi – Qodirov

Olam

image
0:00
0:00
download

Rossiya Qurolli Kuchlari Ukrainadagi shaharlar, qishloqlar va boshqa aholi punktlariga qarshi hujum uyushtirishni rejalashtirmoqda. Checheniston rahbari Ramzan Qodirov ijtimoiy tarmoqdagi sahifasida shaxsan Rossiya Prezidenti Vladimir Putin shunday buyruq berganini ma’lum qildi.

“Vazifalar aniq va biz allaqachon ishlarni boshlaganmiz. Hujum to‘lqini nafaqat Mariupolda, balki boshqa barcha aholi punktlari, shaharlar va qishloqlarda ham bo‘ladi. Lekin birinchi navbatda biz Lugansk va Donetskni to‘liq ozod qilamiz. Bunday vazifani Bosh Qo‘mondon (Rossiya Prezidenti Vladimir Putin — tahr.) qo‘ygan”, deydi u.

Avvalo, Ramzan Qodirov rus qo‘shinlari Kiyev va Ukrainaning boshqa barcha shaharlarini egallashga tayyorligini ta’kidladi. Ammo, keyin u rezervatsiya qildi va “shaharlarni egallash” maqsadi yo‘qligini hamda vazifa bu nuqtalarni “natsistlar” va “Bandera”dan ozod qilish ekanligini tushuntirdi.

Murojaatni sharhlar ekan, Checheniston rahbari obunachilarni bundan keyin nima bo‘lishi “juda qiziq bo‘ladi” deb ishontirdi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.


Maqola muallifi

Teglar

Baholaganlar

197

Reyting

3.1

Maqolaga baho bering

Doʻstlaringiz bilan ulashing