Prigojinning o‘limiga Ukrainaning aloqasi yo‘q – Zelenskiy 

Ukraina Prezidenti Vladimir Zelenskiy “Vagner” rahbari Yevgeniy Prigojinning Rossiyada halokatga uchrashiga Ukrainaning aloqasi yo‘qligini aytdi. Bu haqda Zelenskiy Portugaliya Prezidenti Marselu Rebelu di Soza bilan o‘tkazilgan matbuot anjumanida aytib o‘tdi.

"Ukraina havo kemalari bo‘yicha dunyo davlatlariga murojaat qilganda, biz buni nazarda tutmadik, balki butunlay boshqacha fikrda edik va bizni qo‘llab-quvvatlashlarini xohlagandik. Garchi bu ham qaysidir ma’noda yordam berishi mumkin. Birinchidan, bu holatga bizning hech qanday aloqamiz yo‘q, bu aniq. O‘ylaymanki, kim ishtirok etganini hamma biladi”, degan Zelenskiy.

Shuningdek, Zelenskiy Ukraina razvedkachilari Qrimda maxsus operatsiya o‘tkazganini tasdiqlagan.

“Qrimning ozod etilishi haqida gapirishga hali erta. Bu birinchisi. Ikkinchidan, batafsil hisobotni general Budanovdan olaman. Uchinchidan, ha, bu bizning yigitlar. To‘rtinchidan, biz tomondan qurbonlar yo‘q. Bu yaxshi yangilik.”, deydi u.

Eslatib o‘tamiz, kecha, 23 avgust kuni Rossiyaning Tver viloyatida halokatga uchragan samolyot bortida “Vagner” rahbari Yevgeniy Prigojin va hammuassisi Dmitriy Utkin bo‘lgani, bortdagi barcha 10 yo‘lovchi halok bo‘lgani aytilgandi. Ukraina Prezidenti devoni rahbari maslahatchisi Mixail Podolyak esa Prigojinning o‘limi davlat to‘ntarishiga urinishdan ikki oy o‘tgach, Rossiya Prezidenti Vladimir Putinning Rossiya elitasiga bergan signali ekanini qayd etgandi.