Kreml Kiyevni muzokaralar uchun qonuniy to‘siqlarni olib tashlashga chaqirdi

Agar Ukraina fuqarolik infratuzilmasiga hujumlarni to‘xtatish bo‘yicha Rossiya bilan to‘g‘ridan to‘g‘ri muzokaralar olib borishni istasa, buning uchun qonuniy to‘siqlarni olib tashlashi kerak. Bu haqda bugun, 22 aprel kuni Rossiya Prezidenti matbuot kotibi Dmitriy Peskov bayonot berdi.

“Agar Ukraina tomoni xohlasa, Ukraina tomoni ochiq bo‘lsa, bunday aloqalar yo‘lidagi bu to‘siqlarni qonuniy ravishda “olib tashlash” uchun qandaydir qadamlar qo‘yilishi kerak”, dedi Peskov jurnalistlarga, agar Ukrainada Rossiyaning amaldagi rahbariyati bilan to‘g‘ridan to‘g‘ri aloqalar qonun bilan taqiqlangan bo‘lsa, qanday qilib muzokaralar o‘tkazish mumkinligi haqidagi savolga javob berar ekan.

Shu bilan birga, Rossiya Prezidenti matbuot kotibi Kreml “turli kanallar orqali” Vashington bilan Ukrainada tinchlik o‘rnatish bo‘yicha muzokaralarni davom ettirayotganini ma’lum qildi. Peskovning so‘zlariga ko‘ra, Rossiya-Ukraina mojarosini hal qilish masalasi “shunchalik murakkab”ki, “qisqa muddat” belgilashdan ma’no yo‘q.

Shuningdek, bugun, 22 aprel kuni Kreml shu haftada AQSH Prezidentining maxsus vakili Stiven Uitkoffning Moskvaga tashrifini kutayotganini ma’lum qildi.

Ma’lumot uchun, 2022 yil oktyabr oyida Ukraina Prezidenti Vladimir Zelenskiy Ukraina Milliy xavfsizlik va mudofaa kengashining Rossiya Federatsiyasining amaldagi rahbariyati bilan muzokaralarni rad etish haqidagi qarorini farmon bilan tasdiqlagan edi. Keyinchalik Zelenskiy ushbu farmonni mamlakatdagi “separatchilikni to‘xtatish” istagi bilan izohladi:

“Men Ukraina Prezidentiman, u yoki bu muzokaralarning rahbariman, qolgan hammaga [muzokaralarni] man qilganman”, degandi u o‘shanda.

Eslatib o‘tamiz, 20 aprel kuni Ukraina yetakchisi Vladimir Zelenskiy Rossiyaga fuqarolik infratuzilmasiga hujumlarni 30 kunga “uzaytirish imkoniyati bilan” to‘xtatishni taklif qilgan edi. Bunga javoban Rossiya Prezidenti Vladimir Putin ushbu tashabbusni to‘g‘ridan to‘g‘ri muzokaralar formatiga imkon beradigan “saralash” kerakligini aytdi. Peskovning aytishicha, Kiyevdan Putinning bayonotiga keyinroq hech qanday munosabat bildirilmagan.