Россия Пасха сулҳини 2000 дан ортиқ марта бузди – Зеленский

Украина Президенти Владимир Зеленский Россияни Пасха сулҳини бузганликда айблади, аммо Москвани сулҳни узайтиришга чақирди. Бу ҳақда у ўзининг Telegram-каналида ёзди.

Унинг сўзларига кўра, Россия армияси икки минг мартадан ортиқ ўт очишни тўхтатиш режимини бузган, бироқ ҳаво таҳдиди сигнали 20 апрель куни бир марта ҳам янграмаган.

“Бу эришилган ва давом эттириш энг осон бўлган сукунат формати. Украина узайтириш имконияти билан камида 30 кун давомида фуқаролик инфратузилмасига узоқ масофали дрон ва ракеталар томонидан ҳар қандай зарба беришдан тийилишни таклиф қилмоқда”, дейди Зеленский.

Украина Президенти Украина Қуролли Кучлари Бош Қўмондони Александр Сирскийнинг ҳисоботига таяниб, 30 соатлик ўт очишни тўхтатиш режимида Россия қўшинлари турли йўналишларда, асосан, Покровскоеда 67 та ҳужум уюштирганини маълум қилди. 

“1355 та ҳужум қайд этилган, улардан 713 таси оғир қуроллар, шунингдек, россияликлар томонидан 673 таси FPV дронларидан фойдаланган”, деди Владимир Зеленский.

Ишғол қилинган Украина ҳудудлари ишғолчилари ҳам Украина Қуролли кучлари томонидан ўт очишни тўхтатиш режимини бузганини эълон қилди. Херсон вилоятининг Москва томонидан тайинланган “губернатори” Володимир Салдо Украина армиясини Олешки, Хола Пристан ва Каховкага дронлар ҳужумлари ва миномётлардан зарба беришда айблади.

Россия Ташқи ишлар вазирлигининг махсус топшириқлар бўйича элчиси Родион Мирошникнинг сўзларига кўра, Украина Қуролли кучлари 20 апрель куни эрта тонгда Донецк вилояти Горловканинг Никитовский тумани, шунингдек, Кременная шаҳри чеккаларини ўққа тутган.

Кейинроқ Россия Мудофаа вазирлиги ўт очишни тўхтатиш режими эълон қилинганидан сўнг Украина Қуролли кучлари Россия позицияларига 444 марта ўқ узганини ва 900 та учувчисиз ҳаво ҳужуми уюштирганини маълум қилди.

Россия президенти матбуот котиби Дмитрий Песковнинг айтишича, Кремль бугун, 21 апрель ярим тунда тугаган Пасха сулҳини узайтиришни режалаштирмаяпти.

19 апрель куни Россия Президенти Владимир Путин Пасха байрами муносабати билан 19 апрель соат 18:00 дан бошлаб 21 апрель куни соат 00:00 га қадар ўт очишни тўхтатишни эълон қилди. Ушбу 30 соатлик муддат ичида Россия қўшинларига барча ҳарбий ҳаракатларни тўхтатиш буйруғи берилди.

Владимир Зеленский ўт очишни тўхтатиш режимига риоя қилишга рози бўлди, уни узайтиришни таклиф қилди ва Москвани ҳужумлар ва отишмалар давом этаётганликда айблади.