Kanada Bosh vaziri ko‘chirmakashlikda gumonlanmoqda

Kanada Bosh vaziri Mark Karni Oksford universitetida iqtisodiyot bo‘yicha doktorlik darajasini olish uchun 1995 yilda yozgan “Raqobatning dinamik ustunligi” nomli dissertatsiyasi uch nafar universitet akademigi tomonidan o‘rganildi va ushbu materialda o‘nta aniq plagiat holati aniqlandi. Bu haqda “National Post” nashri xabar berdi.

Nashrning yozishicha, dissertatsiyaning bir nechta bo‘limida Karni to‘liq iqtiboslar, parafrazalar yoki biroz o‘zgartirilgan jumlalarni avvalroq yozilgan ilmiy ishdan muallifga tegishli ishora bermasdan ishlatgan.

“U shunchaki to‘g‘ridan to‘g‘ri takrorlagan, lekin qo‘shtirnoq ishlatmagan. Biz buni plagiat deb ataymiz”, dedi Britaniyaning Kolumbiya universiteti Okanagan filiali rektori huzuridagi talabalarning intizomiy masalalari bo‘yicha maslahat qo‘mitasi a’zosi, dotsent Joffri Sigalet.

Ushbu qo‘mita universitetda plagiat bilan bog‘liq ishlarni ko‘rib chiqadi. “National Post” nashri Karni jamoasiga ushbu o‘nta plagiat holatini taqdim etgan.

Karnining saylov shtabi dastlab Oksford universitetidagi uning doktorlik rahbarining bayonotini taqdim etgan.

“Siz bu ishni noto‘g‘ri talqin qilyapsiz, deb hisoblayman. Qariyb 40 yillik akademik tajribaga ega inson sifatida men siz tilga olgan dissertatsiyada plagiat borligiga yoki odatdagidan tashqari akademik amaliyotlar qo‘llanilganiga hech qanday dalil ko‘rmayapman”, deydi Nuffild kollejining rasmiy iqtisod fanlari xodimi, amerikalik iqtisodchi Margaret Meyer taqdim etilgan bayonotda.

Meyer, shuningdek, Markning dissertatsiyasi fakultet qo‘mitasi tomonidan baholanganini va tasdiqlanganini ta’kidlagan.

Oksford universiteti plagiat tushunchasini quyidagicha ta’riflaydi:

“Boshqa manbadan olingan ish yoki g‘oyalarni o‘zingizniki sifatida taqdim etish, ya’ni ularni to‘liq manbaga ishora bermasdan ishga kiritish”.

Oksford universiteti bitiruvchisi bo‘lgan professorlardan biri Karni tomonidan sudga berilishdan xavotirda bo‘lgani sababli anonimlik sharti bilan gapirib, liberal yetakchining dissertatsiyasidagi muammoli parchalar plagiat ta’rifiga mos kelishini tasdiqlagan.

Eslatib o‘tamiz, yanvar oyi boshida Jastin Tryudo hukmron Liberal partiya raisi lavozimini tark etishini, ammo Bosh vazirlikdan partiyaning yangi rahbari saylangandan keyin iste’foga chiqishini ma’lum qilgan edi. Shuningdek, Tryudo Kanada general-gubernatori Meri Saymondan parlament faoliyatini 24 martgacha to‘xtatishni so‘ragan. Keyinroq esa Kanadaning sobiq Markaziy banki rahbari Mark Karni Liberal partiyaning yangi yetakchisi etib saylandi va 14 mart kuni qasamyod qilib, o‘z lavozimiga kirishdi.