Трюдо кетди. Янги Бош вазир қачондан ишга киришади?

Канаданинг бўлажак бош вазири Марк Карни 2025 йилнинг 14 март куни қасамёд қилиб, ҳукумат бошқарувига киришади. Бу ҳақда CTV телеканали хабар берди.

Телеканал маълумотларига кўра, маросим маҳаллий вақт билан соат 11:00 да (Тошкент вақти билан 21:00) Канада генерал-губернатори Мэри Саймон қароргоҳида бўлиб ўтади. Тартиб-қоидага кўра, мамлакат Бош вазири Жастин Трюдо генерал-губернатор ҳузурига бориб, расман истеъфосини эълон қилади. Шундан сўнг, Карни зарур қасамёдларни қабул қилиб, бош вазир сифатида иш бошлайди. Карни билан бирга унинг ҳукумат аъзолари ҳам қасамёд қилади, бироқ кимлар вазирлар маҳкамасига киритилиши ҳозирча номаълум.

Шунингдек, янги бош вазир ўз ҳукуматини тақдим этади, жумладан, у тайинлаган вазирлар рўйхатини эълон қилади.

Эслатиб ўтамиз, аввалроқ ўзининг охирги матбуот анжуманида Жастин Трюдо кўзида ёш билан “ҳар куни” канадаликларни биринчи ўринда қўйганини ва уларни қўллаб-қувватлаганини айтганди. Шунингдек, у “янги, қонуний равишда сайланган ворисга” ваколатларини топширишни “сабрсизлик билан кутаётганини” қўшимча қилган. Лавозимини тарк этаётган Бош вазир ўзига истеъфо эълон қилингандан кейин оммавий палатадан ўз стулини олиб чиқиб кетаётиб, камерага тилини кўрсатганди.