Канаданинг янги Бош вазири сайланди

Канаданинг собиқ Марказий банки раҳбари Марк Карни Либерал партиянинг янги етакчиси этиб сайланди ва мамлакатнинг навбатдаги Бош вазири бўлади. Бу ҳақда “Reuters” хабар берди.

Карни 1965 йил 16 мартда Канаданинг Форт-Смит шаҳрида туғилган. 1988 йилда Гарвард университетини иқтисодиёт йўналиши бўйича тамомлаган. 1993 йилда Оксфорд университетида иқтисодиёт бўйича магистр, 1995 йилда эса докторлик даражасини олган. У 13 йил давомида Goldman Sachs компаниясининг Лондон, Нью-Йорк, Торонто ва Токио филиалларида ишлаган. 2008-2013 йилларда Канада банки, 2013-2020 йилларда эса Англия банки бошқарувчиси бўлган.

Либерал партия ички сайловларида Карни 85,9 фоиз овоз билан ғалаба қозонган. Унинг асосий рақиби, собиқ молия вазири ва бош вазир ўринбосари Христя Фриланд 8 фоиз овоз олган.

Карни Бош вазирлик лавозимини эгаллаш учун парламент сайловлари ўтказилишини кутмоқда. Сайловлар жорий йил 20 октябрга белгиланган бўлса-да, сиёсий вазият сабабли улар олдинроқ ўтказилиши мумкин.

Карни ўзининг иқтисодий тажрибасига таяниб, ўрта синф учун солиқларни камайтириш, мудофаа харажатларини ЯИМнинг 2 фоиз ва ундан юқори даражага ошириш, шунингдек, АҚШ маҳсулотларига “доллар учун доллар” тамойили асосида божхона тўловларини жорий этишни ваъда қилган.

Қайд этиш жоиз, Канада ва АҚШ ўртасидаги савдо муносабатлари ҳозирда таранг бўлиб, АҚШ Президенти Дональд Трамп Канадага қарши божхона тўловларини жорий қилган. Бунга жавобан, Жастин Трюдо 30 миллиард Канада доллари миқдорида жавоб божларини киритди. Карни ушбу савдо муаммоларини ҳал қилишни ўзининг устувор вазифаларидан бири сифатида белгилаган.
 
Эслатиб ўтамиз, январь ойи бошида Жастин Трюдо ҳукмрон Либерал партия раиси лавозимини тарк этишини, аммо Бош вазирликдан партиянинг янги раҳбари сайлангандан кейин истеъфога чиқишини маълум қилган эди. Шунингдек, Трюдо Канада генерал-губернатори Мери Саймондан парламент фаолиятини 24 мартгача тўхтатишни сўраган. Бу чора мухолиф партиялар томонидан январь охирига режалаштирилган ишончсизлик вотумини ўтказишга тўсқинлик қилиш учун зарур.