Qozog‘istonda ko‘zi ojiz erkak metro vagoni ostida qolib vafot etdi (video)

Qozog‘istonning Olmota shahri metrosida 26 yoshli ko‘zi ojiz erkak metro vagoni ostiga tushib ketib, halok bo‘ldi. Bu haqda “Kazinform” xabar berdi.

Qayd etilishicha, fojia joriy yilning 10 dekabr kuni soat 15:41 da metroning “Abay” bekatida yuz bergan. Ko‘rish imkoniyati cheklangan erkak hassasi yordamida vagon eshigining qayerdaligini aniqlashga uringan. Hassasi vagonlar orasidagi bo‘shliqqa tushgach, u oldinga qadam tashlagan va metro relsi ustiga tushib ketgan. Metropoliten xizmati stansiya navbatchisi va mashinist tezkor ravishda harakatni to‘xtatgan. Shundan so‘ng, yo‘lovchi platformaga chiqarilgan, biroq uning hayotini saqlab qolishning imkoni bo‘lmagan.

Hodisa yuzasidan politsiya tergov harakatlarini boshlagan.

Eslatib o‘tamiz, avvalroq Toshkent shahrida “Toshkent-Xo‘jakent” yo‘nalishidagi yo‘lovchi poyezdi harakatlanib ketayotgan vaqtida temiryo‘lning yo‘lovchilar o‘tish joyidan velosipedni minib o‘tayotgan vaqtida voyaga yetmagan 15 yoshli qashqadaryolik o‘smirni urib yuborgandi.