Dueyn Jonson Gollivuddagi mitinglar uchun bir necha million xayriya qildi

“Forsaj” va “Jumanji”kabi filmlaridagi roli bilan butun dunyoga tanilgan aktyor Dueyn Jonson SAG-AFTRA jamg‘armasi hisobiga anchagina pul o‘tkazdi. U ish tashlash mitinglarida kasaba uyushmasi a’zolari uchun xayriya mablag‘i ajratdi. Bu haqda “The Guardian” nashri xabar berdi.

SAG-AFTRA jamg‘armasining ijrochi direktori Sid Uilsonning ta’kidlashicha, SAG-AFTRA’ning ko‘plab a’zolari ish tashlash vaqtida “moliyaviy qiyinchiliklarga” duch kelishgan. Hatto, ish tashlash boshlanishidan oldin ham jamg‘arma odatda bir hafta ichida ko‘rib chiqadigan yordam so‘rovlaridan 5-10 marta ko‘proq murojaatlarni qabul qilgan va bu o‘sishda davom etyapti.

Shu sababdan jamg‘arma prezidenti Kortni Vens kino sanoatidagi eng ko‘p maosh oluvchi 2700 aktyorga murojaat qilgan. Shundan so‘ng Dueyn Jonson jamg‘armaga yordam sifatida bir necha million dollarlarini ayamagan. Mablag‘ning miqdori aniq aytilmagan bo‘lsa-da, chek "7 ta raqamdan iborat” summani o‘z ichiga olishi ma’lum qilingan.

“Bu biz bir vaqtning o‘zida bir kishidan olgan eng katta xayriyadir. Va hayratlanarlisi shundaki, bitta chek minglab aktyorlarga yashash uchun yordam beradi. Men Dueynga saxiyligi, rahm-shafqati va jamiyatimiz uchun ushbu muhim yo‘lda qadam tashlashda davom etish tashabbusi uchun minnatdorchilik bildirmoqchiman. Uning tarixiy ehsoni yordam beradigan minglab odamlar nomidan rahmat”, dedi Sid Uilson.

Eslatib o‘tamiz, amerikalik aktyorlar uyushmasi SAG-AFTRA va uning muzokarachilari 12 iyul kuni Gollivud studiyalari bilan kelishuvga erishib bo‘lmagani sabab ish tashlashni tavsiya qildi. Keyinchalik Mualliflar gildiyasi sun’iy intellekt kompaniyalarini ularning mualliflik materiallaridan noqonuniy foydalanganlikda ayblab, to‘lov talab qildi. Ushbu mitinglar fonida aktyor va yozuvchilar film premeralari va tadbirlariga tashrif buyurmay qo‘ydi. Natijada Gollivudning doim yulduzlar bilan gavjum bo‘ladigan festivallari huvillab qoldi. Aktyorlar uyushmasi tomonidan tashkil etilgan so‘nggi miting kecha, 25 iyul kuni Nyu-York shahrida bo‘lib o‘tdi.

Sevara Husniddinova