Buxoroda 1,5 yashar bola bog‘chada tok urishidan vafot etdi

Ijtimoiy tarmoqlarda Buxoro viloyatidagi xususiy maktabgacha ta’lim tashkilotlarining birida 1,5 yoshli tarbiyalanuvchi tok urishi oqibatida vafot etgani haqida xabarlar tarqaldi. Mazkur holat yuzasidan viloyat Maktabgacha va maktab ta’limi boshqarmasi munosabat bildirdi.

Qayd etilishicha, vaziyat Buxoro viloyati Maktabgacha va maktab ta’limi boshqarmasi tomonidan nazoratga olinib, holat bo‘yicha tezkor o‘rganish ishlari olib borilgan. O‘rganish jarayonida joriy yilning 28 mart kuni Buxoro tumanida joylashgan YATT X.O‘.U. oilaviy nodavlat maktabgacha ta’lim tashkilotida 2023 yilda tug‘ilgan tarbiyalanuvchi Sh.Sh.ning vafot etgani aniqlangan. Ayni paytda IIB tomonidan bolaning o‘lim sabablari yuzasidan tergov-surishtiruv ishlari olib borilmoqda.

“Holat bo‘yicha qo‘shimcha ma’lumot berilishini ma’lum qilamiz”, deyiladi xabarda.

Eslatib o‘tamiz, avvalroq Toshkent viloyatidagi xususiy tadbirkor tomonidan qurilayotgan turarjoy kompleksida o‘rnatilgan ko‘tarma kranning o‘qi qo‘shni hududdagi bog‘chaning tom qismiga qulab tushgan edi. Shu sababli bolalar bog‘chasi faoliyati vaqtinchalik to‘xtatilgan. Hodisa oqibatida hech kim jabrlanmagan.