AQSHda ikki avtobus to‘qnashishi oqibatida 80 dan ortiq odam jabrlandi (video)

AQSHning Nyu-York shahridagi yirik chorrahalardan birida ikki qavatli sayyohlik avtobusi jamoat transporti avtobusi bilan to‘qnashishi oqibatida kamida 80 kishi jarohatlandi. Bu haqda ABC telekanali xabar berdi.

Qayd etilishicha, yo‘l-transport hodisasi shaharning Manxetten borosi (tuman)ning Birinchi avenyu hamda 23-ko‘chasi kesishmasida 7 iyul kuni mahalliy vaqt bilan soat 19:00 da sodir bo‘lgan. To‘qnashuvga sayyohlik avtobusi svetoforning qizil chirog‘ida harakatlangani sabab bo‘lgan. Hodisa sodir bo‘lgan paytda ikkala avtobus ham yo‘lovchilar bilan to‘la bo‘lgan.

Avtohalokat oqibatida kesilgan, ko‘kargan, tirnalgan, shuningdek, ba’zi bo‘yin va bosh jarohatlari bilan 18 kishi  shifoxonaga yotqizilgan. Yana 63 kishi suyak sinishi ehtimoli borligi sabab tibbiy ko‘rikdan o‘tkazilayotgani ma’lum qilindi. Jarohatlarning hech biri hayot uchun xavfli emasligi aytilmoqda.

Eslatib o‘tamiz, avvalroq Peruda avtobus halokati oqibatida 24 kishi halok bo‘lgandi. Pokistonda esa avtobus YTHga uchrashi ortidan 40 dan ortiq odam yonib ketgan.