AQSH Venesuelaga 900 nafardan ortiq harbiy yubordi

AQSH Venesuelada kuchli zilzilalardan keyingi qutqaruv va gumanitar yordam ishlarini qo‘llab-quvvatlash uchun mamlakatga 900 nafardan ortiq harbiy xizmatchini yubordi. Bu haqda “Reuters” xabar berdi.

Yana qariyb 800 nafar harbiy Puerto-Riko va Kyurasaodagi bazalarda joylashtirilgan.

AQSH Janubiy qo‘mondonligi rahbari, general Fransis Donovanning aytishicha, AQSH harbiylari qidiruv-qutqaruv ishlarida qatnashib, aeroport faoliyatini tiklashga yordam bergan hamda xalqaro gumanitar yuklarning mamlakatga yetib kelishini ta’minlash uchun havo va dengiz kuchlarini safarbar qilgan. Shuningdek, shikastlangan hududlarni aniqlash va yo‘llarning holatini kuzatish uchun MQ-9 Reaper razvedka dronlari ham jalb etilgan.

Joriy yilning 24 iyun kuni Venesuelaning shimoliy va markaziy hududlarida ikkita kuchli zilzila sodir bo‘lgan edi. Oqibatda mamlakat poytaxti Karakas shahrida turar joy binolari va boshqa inshootlar qulab tushgan. Avval magnitudasi 7,2 bo‘lgan zilzila qayd etilgan. Undan bir daqiqadan ham kam vaqt o‘tib, magnitudasi 7,5 bo‘lgan ikkinchi zilzila sodir bo‘lgan.

AQSH harbiylari Venesuelada uzoq muddat qolishni rejalashtirayotganini bildirmagan. General Donovan missiya faqat gumanitar yordam va qutqaruv ishlarini qo‘llab-quvvatlashga qaratilganini ta’kidlagan.

Eslatib o‘tamiz, avvalroq Braziliya hukumati zilzila oqibatida katta zarar ko‘rgan Venesuela infratuzilmasini qayta tiklash ishlarida ishtirok etish imkoniyatini ko‘rib chiqayotgani haqida xabar berilgan edi.