Бразилия Венесуэладаги вайрон бўлган инфратузилмани тиклашга ёрдам беради

Бразилия ҳукумати зилзила оқибатида катта зарар кўрган Венесуэла инфратузилмасини қайта тиклаш ишларида иштирок этиш имкониятини кўриб чиқмоқда. Бу ҳақда “Brasil 247” нашри хабар берди.

Нашр маълумотига кўра, Бразилия мудофаа вазири Жозе Мусио Монтейро Каракасга ташрифи чоғида икки давлат ўртасида офат оқибатларини бартараф этиш бўйича узоқ муддатли ҳамкорликни кучайтириш муҳимлигини таъкидлаган.

“Биз яна қандай ёрдам бера олишимизни ўрганишимиз керак. Бундан буён Бразилия ва Венесуэла биргаликда ҳаракат қилади”,  деган вазир Венесуэла расмийлари билан учрашувдан сўнг.

Шунингдек, у Бразилия молия институтлари вакиллари ҳам Венесуэлада узоқ муддатли тикланиш лойиҳаларида қандай иштирок этиш мумкинлигини баҳолаш учун мамлакатга келганини маълум қилди.

Нашр таъкидлашича, Бразилия Венесуэла шаҳарларини қайта қуриш режаларини ишлаб чиқишда 2023 йилда Риу-Гранди-ду-Сул штатида юз берган йирик сув тошқинлари оқибатларини бартараф этиш тажрибасидан фойдаланмоқчи.

Бундан ташқари, Бразилия молия институтлари Венесуэла инфратузилмасини тиклаш лойиҳаларини истиқболли деб ҳисобламоқда. Бу борада мамлакат 1999–2013 йилларда Уго Чавес президентлиги даврида Венесуэлада амалга оширилган уй-жой қурилиши лойиҳалари бўйича ҳам муайян тажрибага эга.

Эслатиб ўтамиз, аввалроқ Испаниянинг “Реал Мадрид” клуби ҳамда унинг президенти Флорентино Перес Венесуэлада содир бўлган кучли зилзилалар оқибатида жабрланганларга ёрдам кўрсатиш учун жами 2 миллион евро хайрия қилиши ҳақида хабар берилганди.