AQSH va Rossiya vakillari Vashingtonda muzokara o‘tkazadi

Rossiya to‘g‘ridan to‘g‘ri investitsiyalar jamg‘armasi rahbari Kirill Dmitriyev shu hafta Vashingtonga borib, AQSH Prezidentining maxsus vakili Stiven Uitkoff bilan uchrashishi mumkin. Bu haqda manbalarga tayanib, CNN telekanali xabar berdi.

Dmitriyevning tashrifi yuqori martabali rossiyalik mulozimning 2022 yildan buyon muzokaralar uchun AQSH poytaxtiga ilk bor tashrifi bo‘lishi mumkin. Ta’kidlanishicha, uchrashuv Rossiya va AQSH o‘rtasidagi munosabatlarni mustahkamlash va Ukrainadagi mojaroga barham berish yo‘llarini topishdan iborat bo‘ladi.

CNN xabariga ko‘ra, AQSH hukumati Dmitriyevga qarshi sanksiyalarni Davlat departamenti unga mamlakatga kirish vizasini berishi uchun to‘xtatgan.

Ma’lumot uchun, mart oyi oxirida Dmitriyev “Izvestiya” nashriga Rossiya va AQSH nodir yer metallari loyihalari bo‘yicha muzokaralarni boshlaganini aytgandi.

Eslatib o‘tamiz, 18 fevral kuni Saudiya Arabistoni poytaxti Ar-Riyodda Rossiyadan Tashqi ishlar vaziri Sergey Lavrov, Prezident yordamchisi Yuriy Ushakov va Rossiya to‘g‘ridan to‘g‘ri investitsiyalar jamg‘armasi rahbari Kirill Dmitriyevdan iborat Rossiya delegatsiyasi AQSH vakillari bilan muzokara o‘tkazgandi. Uchrashuvda AQSH Davlat kotibi Marko Rubio, AQSH Prezidenti Donald Trampning milliy xavfsizlik bo‘yicha maslahatchisi Mayk Uolts va Trampning Yaqin Sharq bo‘yicha maxsus vakili Stiv Uitkoff ishtirok etdi. Dmitriyev Saudiya Arabistonida ikki tomonlama muzokaralar boshlanishidan oldin Amerika neft kompaniyalari Rossiyaga qaytishi mumkinligi, Kreml ham AQSH bilan Arktikadagi qo‘shma loyihalardan manfaatdor ekanini aytgandi. Keyinchalik Rossiya Prezidenti Vladimir Putin Kirill Dmitriyevni xalqaro iqtisodiy hamkorlik bo‘yicha maxsus vakil etib tayinladi.