Россия АҚШга нефть бозорига киришни таклиф қилмоқда – ОАВ

Америка нефть компаниялари Россияга қайтиши мумкин, Кремль ҳам АҚШ билан Арктикадаги қўшма лойиҳалардан манфаатдор. Бу ҳақда Россия тўғридан тўғри инвестициялар жамғармаси раҳбари Кирилл Дмитриев Саудия Арабистонида икки томонлама музокаралар бошланишидан олдин маълум қилди, деб ёзди бугун, 18 февраль куни бир қатор рус оммавий ахборот воситалари ва ахборот агентликлари.

Дмитриев Россия Президенти Владимир Путин томонидан Ар-Риёдда Америка делегацияси билан учрашиш учун танланган уч делегатдан бири эди. Унинг сўзларига кўра, Москва АҚШ билан иқтисодий ҳамкорликни тиклашни муҳим деб билади.

“Биз улар қачондир қайтиб келишларига ишонамиз, чунки нега улар Россия берган табиий ресурсларга кириш имкониятидан воз кечишди?” деди Россия тўғридан-тўғри инвестициялар жамғармаси раҳбари.

У Американинг йирик нефть компаниялари Россияда “жуда муваффақиятли бизнесга”эга эканини қўшимча қилди.

Дмитриевнинг сўзларига кўра, Америка компаниялари Россияга киритилган санкциялардан 300 миллиард еврога яқин зарар кўрган ва АҚШнинг собиқ президенти Жо Байден маъмурияти Россия иқтисодиётининг аҳволи ҳақида “кўп нотўғри хабарлар берган”.

“The Мосcоw Times”нинг ёзишича, Украинага тўлиқ миқёсда бостириб киришдан олдин Россия Федерациясида фақат битта йирик Америка компанияси нефть қазиб олиш билан шуғулланган: “Сахалин-1” лойиҳасида 30 фоиз улушга эга Exxon Mobil. Санкциялар киритилгандан сўнг компания лойиҳадан чиқишини эълон қилди, бироқ ўз улушини сота олмади, чунки Кремль бу муддатни икки марта, охирги марта 2026 йил охиригача узайтирди.

2022 йилда Украинага қарши уруш бошланганидан сўнг, Американинг яна бир қанча йирик нефть конлари хизматлари компаниялари – Halliburton, Schlumberger ва Baker Hughes Россия бозоридан чиқиб кетишларини эълон қилди. Айнан уларнинг ёрдами билан Россия Федерацияси СССРнинг сўнгги йилларида ишлаб чиқариш қулаганидан кейин нефть қазиб олишни тиклашга муваффақ бўлганди.

“Путин 2025 йилга бориб углеводородларни бурғулаш ва қидириш бўйича маҳаллий технологиялар улушини 80 фоизга етказишни талаб қилди”, деб эслайди “The Мосcоw Times”.

Бироқ, бундай ускуналарнинг ярмидан кўпи ҳали ҳам Россия Федерациясига “нодўстона” мамлакатлардан етказиб берилади.

Ар-Риёддаги Россия-АҚШ музокаралари

Бугун, 18 февраль куни Саудия Арабистонида Кирилл Дмитриевдан ташқари Россиядан Ташқи ишлар вазири Сергей Лавров ва Президент ёрдамчиси Юрий Ушаков иштирок этди. Дмитриев музокараларни “ижобий” деб атади. 

Учрашувда АҚШ Давлат котиби Марко Рубио, АҚШ Президенти Дональд Трампнинг миллий хавфсизлик бўйича маслаҳатчиси Майк Уолтц ва Трампнинг Яқин Шарқ бўйича махсус вакили Стив Уиткофф иштирок этди. Украина ва Европа давлатлари музокараларда қатнашмади.

Бир кун аввал АҚШ маъмурияти Киевнинг АҚШ Президенти таклиф қилган табиий ресурслар бўйича келишувни тузишдан бош тортганини танқид қилган эди. Вашингтон Украина Президенти Владимир Зеленскийнинг Трамп таклифини рад этиш қарорини “қисқа кўриш” деб ҳисоблайди. Украинанинг собиқ юқори лавозимли амалдорларидан бири келишувни “мустамлакачилик келишуви” деб атади.