Трамп Финляндиядан музёрар кемалар сотиб олмоқчи 

Финляндия Президенти Александр Стубб кеча, 29 март куни Флоридада АҚШ Президенти Дональд Трамп билан норасмий учрашди. Бу ҳақда Финляндия Президенти ижтимоий тармоқдаги саҳифасида хабар берди.

Учрашув Америка етакчисига тегишли Трамп халқаро гольф клубида бўлиб ўтди. Икки давлат раҳбарлари ўзаро ҳамкорликни мустаҳкамлаш, Украинадаги урушни муҳокама қилди ва гольф ўйнади.

Музокараларнинг муҳим мавзуларидан бири Арктикадаги таъсирини кучайтириш учун АҚШ томонидан кутилаётган музёрар кемаларни сотиб олиш бўлди.

north_east

Трамп АҚШ Гренландияни аннексия қилишини айтди

“Президент Стубб ва мен Қўшма Штатлар ва Финляндия ўртасидаги ҳамкорликни мустаҳкамлашни, жумладан, Қўшма Штатлар учун жуда зарур бўлган кўплаб музёрар кемаларини сотиб олиш ва ривожлантиришни интиқлик билан кутамиз, бу бизнинг мамлакатларимиз ва бутун дунё учун тинчлик ва халқаро хавфсизликни таъминлайди”, деб ёзди Трамп ўзининг Truth Social платформасида.

Трампнинг Стубб билан учрашуви АҚШ вице-президенти Жеймс Дэвид Вэнс Шимолий Европада Финляндиянинг яқин иттифоқчиси Даниянинг автоном ҳудуди бўлган Гренландиядаги Питуффик ҳарбий базасига ташриф буюрганидан бир кун ўтиб бўлди. Вэнс оролга ташрифи давомида Данияни Гренландияни етарлича ҳимоя қила олмаганликда айблади. 

“Агар АҚШ Гренландияга қизиқиш билдирмаса, минтақадаги иштирокини кенгайтираётган Россия ва Хитой қизиқиш билдиради”, деди у.

Арктикани назорат қилиш учун глобал рақобат кучайиб бораётган бир пайтда Трамп Гренландияни қўлга киритиш истагини бир неча бор билдирган. Дания ва Гренландияликларнинг аксарияти оролнинг АҚШга сотилишига қарши.

29 март куни NBC News телеканалига берган интервьюсида Трамп Гренландия устидан назоратни қўлга киритиш учун “ҳарбий куч ишлатиш”ни истисно қилмаслигини, бироқ бу мақсадга куч ишлатмасдан эришиш учун “яхши имконият” борлигига ишонишини айтди.

Гренландияни сотиб олиш Россия ва дунёга қандай хабар юборади деган саволга Трамп: 

“Мен бу ҳақда ўйламайман. Менга фарқи йўқ”, деб жавоб берди.