Tramp Finlyandiyadan muzyorar kemalar sotib olmoqchi 

Finlyandiya Prezidenti Aleksandr Stubb kecha, 29 mart kuni Floridada AQSH Prezidenti Donald Tramp bilan norasmiy uchrashdi. Bu haqda Finlyandiya Prezidenti ijtimoiy tarmoqdagi sahifasida xabar berdi.

Uchrashuv Amerika yetakchisiga tegishli Tramp xalqaro golf klubida bo‘lib o‘tdi. Ikki davlat rahbarlari o‘zaro hamkorlikni mustahkamlash, Ukrainadagi urushni muhokama qildi va golf o‘ynadi.

Muzokaralarning muhim mavzularidan biri Arktikadagi ta’sirini kuchaytirish uchun AQSH tomonidan kutilayotgan muzyorar kemalarni sotib olish bo‘ldi.

north_east

Tramp AQSH Grenlandiyani anneksiya qilishini aytdi

“Prezident Stubb va men Qo‘shma Shtatlar va Finlyandiya o‘rtasidagi hamkorlikni mustahkamlashni, jumladan, Qo‘shma Shtatlar uchun juda zarur bo‘lgan ko‘plab muzyorar kemalarini sotib olish va rivojlantirishni intiqlik bilan kutamiz, bu bizning mamlakatlarimiz va butun dunyo uchun tinchlik va xalqaro xavfsizlikni ta’minlaydi”, deb yozdi Tramp o‘zining Truth Social platformasida.

Trampning Stubb bilan uchrashuvi AQSH vitse-prezidenti Jeyms Devid Vens Shimoliy Yevropada Finlyandiyaning yaqin ittifoqchisi Daniyaning avtonom hududi bo‘lgan Grenlandiyadagi Pituffik harbiy bazasiga tashrif buyurganidan bir kun o‘tib bo‘ldi. Vens orolga tashrifi davomida Daniyani Grenlandiyani yetarlicha himoya qila olmaganlikda aybladi. 

“Agar AQSH Grenlandiyaga qiziqish bildirmasa, mintaqadagi ishtirokini kengaytirayotgan Rossiya va Xitoy qiziqish bildiradi”, dedi u.

Arktikani nazorat qilish uchun global raqobat kuchayib borayotgan bir paytda Tramp Grenlandiyani qo‘lga kiritish istagini bir necha bor bildirgan. Daniya va Grenlandiyaliklarning aksariyati orolning AQSHga sotilishiga qarshi.

29 mart kuni NBC News telekanaliga bergan intervyusida Tramp Grenlandiya ustidan nazoratni qo‘lga kiritish uchun “harbiy kuch ishlatish”ni istisno qilmasligini, biroq bu maqsadga kuch ishlatmasdan erishish uchun “yaxshi imkoniyat” borligiga ishonishini aytdi.

Grenlandiyani sotib olish Rossiya va dunyoga qanday xabar yuboradi degan savolga Tramp: 

“Men bu haqda o‘ylamayman. Menga farqi yo‘q”, deb javob berdi.