Afsonaviy Kostya Szyu Toshkentdagi boks oqshomida ishtirok etadi 

Joriy yilning 12-17 noyabr kunlari Toshkent shahrida butunjahon boks uyushmasining (WBC)  61-Konvensiyasi bo‘lib o‘tadi. Mazkur tadbirda mashhur boks yulduzi Kostya Szyu ishtirok etadi.Bu haqda O‘zbekiston professional boks federatsiyasi matbuot xizmati xabar berdi.

Asli kelib chiqishi rossiyalik bo‘lgan Kostya Szyu ikki fuqarolikka ega bo‘lib, bir vaqtning o‘zida Rossiya va Avstraliya bokschisi sifatida faoliyat olib borgan. U 1991 yilda havaskorlar o‘rtasida Jahon, SSSR va Yevropa chempionligini qo‘lga kiritgan. 

Szyu professional boks bo‘yicha 34 ta jang o‘tkazgan bo‘lib, faqat 2 marta raqiblaridan mag‘lubiyatga uchragan va 1 ta jangida durang qayd etilgan. Bokschi o‘z vaqtida WBC, WBA va IBF yo‘nalishlarida mutlaq chempionlikni ham qo‘lga kiritgan. 

Shuningdek, federatsiya Kostya Szyudan tashqari yana bir qator boks yulduzlari Toshkentga kelishini bildirgan. Boshqa taniqlilar nomi esa tez orada e’lon qilinadi.

Eslatib o‘tamiz, avvalroq Toshkent shahri mezbonligida bo‘lib o‘tadigan WBC'ning 61-Konvensiyasida mashhur boks yulduzi Amir Iqbol Xon ham qatnashishi xabar qilingan edi. Shuningdek, mazkur tadbirga yana bir boks afsonasi Mayk Tayson ham kelishi kutilmoqda.