30 dan ortiq davlat BRICS’ga kirish istagini bildirdi – Putin 

Rossiya Prezidenti Vladimir Putin 30 dan ortiq davlat BRICS’ga kirish istagini bildirganini aytdi. Bu haqda Rossiya rahbari BRICS’ga a’zo davlatlar xavfsizlik masalalari bo‘yicha mas’ul vakillari bilan uchrashuvda ma’lum qildi.

“Bizning raislik zimmamizga alohida vazifa yuklangan edi – yangi ishtirokchi mamlakatlarning barcha BRICS mexanizmlariga eng tez va organik integratsiyalashuviga har tomonlama yordam berish. Qolaversa, biz ko‘plab davlatlar tomonidan BRICS’ga qiziqish ortib borayotganini e’tiborsiz qoldira olmadik. Bugungi kunda o‘ndan ortiq davlat, aniqrog‘i 34 ta davlat uyushmamiz faoliyatiga u yoki bu shaklda qo‘shilish istagini bildirgan. Shu sababli, BRICS’ning barcha ishtirokchilari bilan Qozonda tasdiqlanishi kerak bo‘lgan yangi toifa – hamkor davlatlar usullari haqida faol muhokama boshlandi", deydi Rossiya Prezidenti.

Uning ta’kidlashicha, Rossiya raisligi dasturi barcha asosiy yo‘nalishlar: siyosat va xavfsizlik, iqtisodiyot va moliya, madaniy-gumanitar aloqalar bo‘yicha sheriklikni rivojlantirishga qaratilgan 200 ta tadbirni o‘z ichiga oladi. Prezidentning so‘zlariga ko‘ra, bugungi kunga qadar raislik rejasi 70 foizdan ko‘proq bajarilgan, 150 ga yaqin tadbirlar, yig‘ilishlar, soha forumlari o‘tkazilgan, ekspertlar va vazirlarning aksariyat uchrashuvlari bo‘lib o‘tgan.

“Rossiya raisligi, aziz do‘stlar, xavfsizlik masalalari bo‘yicha oliy vakillar sifatida sizning vakolatingiz doirasidagi masalalarga katta e’tibor qaratadi. Shu bilan birga, biz terrorizm va ekstremizm tahdidlariga, qurol va giyohvand moddalarning noqonuniy aylanishiga, transmilliy jinoyatchilik va noqonuniy migratsiyaga qarshi kurashishda BRICS’da to‘plangan hamkorlikning chinakam mustahkam tajribasiga tayanamiz", deydi Putin.

Uning qo‘shimcha qilishicha, BRICS guruhining korrupsiyaga qarshi ishi doirasida Rossiya tomonining taklifiga binoan assotsiatsiya davlatlarining poraxo‘rlikka qarshi kurash va noqonuniy jinoiy faoliyatdan olingan mol-mulk va daromadlarni qaytarish bo‘yicha umumiy yondashuvlari tasdiqlangan. Bu BRICS davlatlarining giyohvandlikka qarshi kurashdagi o‘zaro hamkorligi qo‘shimcha turtki bo‘lgan.

Ma’lumot uchun, BRICS'ga 2006 yilda Braziliya, Rossiya, Hindiston va Xitoy tomonidan asos solingan va 2011 yilda Janubiy Afrika unga a’zo bo‘lgan. 2024 yilning 1 yanvarida Misr, Eron, Birlashgan Arab Amirliklari, Saudiya Arabistoni va Efiopiya guruhning to‘liq a’zosi bo‘ldi. Bu yil assotsiatsiyaga Rossiya raislik qilmoqda. Bu yil BRICS sammiti 22-24 oktyabr kunlari Qozon shahrida bo‘lib o‘tadi.

Eslatib o‘tamiz, oldinroq Xitoy rahbari Si Szinpin, Turkiya Prezidenti Rajab Toyib Erdo‘g‘an, Armaniston Bosh vaziri Nikol Pashinyan, Eron Prezidenti Mas’ud Pezeshkiyon BRICS sammitida qatnashishi, Rossiya Prezidenti Vladimir Putin Falastin yetakchisi Mahmud Abbosni ham sammitga taklif qilgani, biroq Abbosning sammitda ishtirok etishi hozircha aniq emasligi xabar qilingandi.