Mayk Tayson Fyuriga qarshi jangda Ngannuga sekundantlik qiladi

Avvalroq sobiq UFC jangchisi Frensis Ngannu va professional boksning super og‘ir vazn toifasida WBC chempioni Tayson Fyuri o‘rtasida boks qoidalariga asoslangan jang bo‘lib o‘tishi haqida xabar berilgan edi. Mazkur jang oqshomida Ngannuning burchagida boks afsonasi Mayk Tayson sekundantlik qiladigan bo‘ldi. Bu haqda Saudiya Arabistonidagi ko‘ngilochar ishlar Bosh boshqarmasi raisi Turki Al-ash-Shayx X(sobiqTwitter) sahifasida ma’lum qildi. 

“Aytganimdek, tez orada syurpriz bo‘ladi. Yagona va takrorlanmas Mayk Tayson Ngannuga Fyuriga qarshi jangi uchun sekundantlik qiladi. Oz qoldi o‘sha kuni bilib olamiz, kim sayyoradagi eng yomon jangchi”, deydi ash-Shayx

Sobiq UFC jangchisi va boksdagi chempion o‘rtasidagi ushbu jang joriy yilning 28 oktyabr kuni poytaxt Ar-Riyodda bo‘lib o‘tishi belgilangan. 

Ma’lumot uchun, Fyuri professional boksda 34 ta jang o‘tkazib, 33 ta g‘alaba va bitta durang natija qayd etgan. U dekabr oyida vatandoshi Derek Chisorani mag‘lub etdi va Jahon boks kengashi (WBC) versiyasi bo‘yicha og‘ir vazn toifasidagi jahon chempionligi unvonini muvaffaqiyatli himoya qilgandi. 

UFC bilan yangi shartnomadagi muammolar sabab xayrlashgan Ngannu esa MMA'da 20 ta jang o‘tkazib, faqat 3 tasida mag‘lubiyatga uchragan. U UFC'ni og‘ir vazn toifasidagi chempionlik maqomida tark etgan.

Eslatib o‘tamiz, avvalroq superog‘ir vazn toifasida sobiq jahon chempioni o‘zbekistonlik bokschi Ruslan Chagayev Tayson Fyuri hamda Fransis Ngannu o‘rtasidagi ehtimoliy jang haqida fikr bildirgandi. Unga ko‘ra, mazkur jang boks qoidalari asosida tashkil etilsa, Fyuri har tomonlama ustunlikka ega chiqadi.