Яна, яна, яна санкциялар керак – Зеленский бутун дунё давлатлари раҳбарларига мурожаат қилди

Украина Президенти Владимир Зеленский дунёни Россия Федерацияси билан савдо алоқаларини бойкот қилишга чақирди. Бу ҳақда давлат раҳбари ўзининг навбатдаги видеомурожаатида гапирган. 

“Биз 12 кундан бери босқиндан ҳимояланяпмиз. Биз бу урушни ҳеч қачон хоҳламаганмиз, лекин у бизга олиб келинди. Биз ўлдиришни орзу қилмаганмиз, лекин биз душманни ўз юртимиздан ва ҳаётимиздан чиқариб ташлашимиз керак. Бизга 80 йил давомида Европанинг ҳеч бир халқи кўрмаган нарсаларга чидаш ёзилган. Европада яна кимдир худди шундай тажовуз қурбони бўладими ёки йўқ, бу бизнинг заминимизда ҳал қилинади”, дейди Президент. 

Зеленский дунё етакчилари билан гаплашгани ва улар ҳам Киев сингари фикрлаётганликларини ифода этган: Украина қитъанинг келажагини ўз қаршиликлари ва дўстларининг ёрдами билан ҳал қилади.

“Агар босқин давом этса ва Россия Украинага қарши режаларидан воз кечмаган бўлса, унда тинчлик учун урушга қарши янги санкциялар пакети, янги санкциялар, янги санкциялар қадами керак. Бизга Россия экспортини бойкот қилиш, хусусан, Россиядан нефть ва нефть маҳсулотларини рад этиш керак. Сиз буни эмбарго ёки шунчаки ахлоқ деб аташингиз мумкин. Қачонки, террорчига пул беришдан бош тортганингизда”, дейди Президент. 

Давлат раҳбари, шунингдек, Россия Федерациясига товарлар етказиб беришни бойкот қилишга чақирди. 

“Агар улар цивилизациялашган қоидаларга риоя қила олмасалар, улар товарлар ва хизматларни олмасликлари керак. Қўйинг, уруш уларни озиқлантирсин”, дейди Зеленский. 

Унинг айтишича, халқаро ҳамжамият янада қатъийроқ ҳаракат қилиши керак. 

“Кимдир ақлини йўқотса, сиз қўрқувни йўқотиб, тижоратни унутишингиз керак. Биз ўзимизни ҳимоя қилишимиз керак. Давлатларга ҳам, компанияларга ҳам ахлоқли муносабатда бўлиш керак. Биз инсониятни йўқ қилмоқчи бўлган ғайриинсоний кучга қарши курашишимиз керак. Украина армиясининг муваффақияти, украин халқининг иродаси, халқаро санкциялар тамойилларига содиқлик – бу тинчликка йўл”, дейди президент.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.