Уруш Украинанинг қанча экин майдонини йўқ қилади?

Украинадаги экин майдонларининг йўқолиши кузги экинларнинг 41 фоизини ва баҳорги экинларнинг 39 фоизини ташкил қилиши мумкин. Бу ҳақда Украинанинг “АПК-Информ” порталида чоп этилган таҳлилий мақолада айтилади. 

“Умуман олганда, бизнинг ҳисоб-китобларга кўра, 2022 йилда баҳорги экинлар майдони атиги 4,7 миллион гектарни ташкил қилиши мумкин, бу ўтган йилга нисбатан (7,7 миллион гектар) 39 фоизга кам”, дейилади мақолада. 

Таъкидланишича, Украина учун кузги экинларни йиғиб олишда бундан ҳам каттароқ йўқотишлар кутилмоқда — улар 41 фоизга етиши мумкин, бу 3,1 миллион гектарга тўғри келади. 

“Гап биринчи навбатда Херсон, Донецк, Луганск, Запорожье, Николаев, Харьков, Суми, Чернигов ва Киев вилоятлари ҳақида кетмоқда”, дейилади мақолада. 

Украина Бош вазири Денис Шмигаль эса кеча, 31 март куни Украина ҳукуматининг “эҳтиёткорлик прогнозлари”га кўра, баҳорги экин майдонларининг йўқотилиши 20 фоиздан ошмаслигини айтган. 

Маълумот ўрнида, Украина қишлоқ хўжалиги маҳсулотларининг энг йирик экспортчиларидан биридир. 2021 йилда у 12 миллиард доллардан ортиққа баҳоланган дон экспорт қилган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.