Украинага юборилган қуроллар конвойи нишонга айланади – Рябков

Украинани Ғарб давлатлари қуроллари билан тўлдириш фақат вазиятни мураккаблаштиради. Бу ҳақда Россия Федерацияси Ташқи ишлар вазири ўринбосари Сергей Рябков айтиб ўтди.

“Биз АҚШни Украинага улар томонидан уюштирилган тарзда бир қатор давлатлардан қурол-яроғ юбориши шунчаки хавфли ҳаракат эмас, балки тегишли конвойларни қонуний нишонга айлантирувчи ҳаракат эканлиги ҳақида огоҳлантирдик”, дейди вазир ўринбосари.

Рябковнинг сўзларига кўра, портатив зенит-ракета комплекслари ва танкга қарши ракета тизимлари каби қурол турларининг Киевга “ўйламасдан узатилиши” ёмон оқибатларга олиб келиши мумкин. Унинг таъкидлашича, Россия огоҳлантиришларини АҚШ жиддий сигнал сифатида қабул қилмаяпти. 

“Халқаро майдонда максимал кескинлик манбаи айнан Қўшма Штатлардир. Мен ҳали улар моддий жиҳатдан нима қилаётгани ёки “жиноий Киев режимини” қўллаб-қувватлаётгани ҳақида гапирмаяпман”, дея хулоса қилган Рябков.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.