Трамп Балогун бўйича қарорга аралашмаганини айтди

АҚШ Президенти Дональд Трамп ўзининг ҳам, FIFA президенти Жанни Инфантинонинг ҳам АҚШ миллий терма жамоаси ҳужумчиси Фоларин Балогуннинг дисквалификациясини тўхтатиб туриш ҳақидаги қарорга алоқаси бўлмаганини билдирди. Бу ҳақда Трамп Оқ уйда журналистлар билан суҳбатда чоғида сўз очди.

“Мен фақат шуни айта оламанки, бу қарорга менинг ҳеч қандай алоқам йўқ эди. Мен шунчаки вазиятни қайта кўриб чиқиш кераклигини айтдим. Мен FIFAга: “Сизлар айнан шундай қилишингиз шарт”, демадим. Мен фақат қарорни қайта кўриб чиқишни сўрадим”, деди Трамп.

Шу билан бирга, у Балогун иши бўйича қайта кўриб чиқишни сўраганини яна бир бор тасдиқлади.

“Жанни ўз ишини аъло даражада бажаради. Менимча, бу унинг шахсий қарори эмас эди. Бу катта қўмита томонидан қабул қилинган қарор”, деди АҚШ Президенти.

Трамп шунингдек, Балогунга қизил карточка кўрсатган ҳакамнинг холислигига ҳам шубҳа билдирди.

“Ҳаммаси шу ердан бошланади: бу вазият умуман қоидабузарлик деб баҳоланмаслиги керак эди. Кейин эса карточка кўрсатган ҳакамга эътибор қаратиш лозим. Унинг келиб чиқишига қарасангиз, бу ҳакам бироз шубҳали. Жуда ҳам шубҳали”, деди Трамп.

АҚШ раҳбари, шунингдек, агар Балогун майдонга тушмаганида, Бельгияга қарши учрашувни адолатсиз деб ҳисоблашини айтди.

“Агар улар бизни ҳалол ўйинда мағлуб этса, бу билан фахрланишлари мумкин. Аммо бошқача йўл билан ғалаба қозонишса, мен буни худди 2020 йилги АҚШ Президентлик сайловлари каби сохталаштирилган деб ҳисоблардим”, дейди Трамп.

Эслатиб ўтамиз, аввалроқ FIFA Интизом қўмитаси Фоларин Балогуннинг дисквалификациясини тўхтатиб, унга Бельгияга қарши Жаҳон чемпионати 1/8 финал баҳсида иштирок этишга рухсат берганини ҳақида хабар берилган эди. Кейинчалик қарор FIFA президенти Жанни Инфантино Оқ уйдан қўнғироқ олганидан сўнг қабул қилингани ҳақида маълумотлар тарқалди.

Бу қарор Европа футбол ассоциациялари иттифоқи (UEFA) томонидан кескин танқид қилиниб, “қизил чизиқ” деб баҳоланди.

Маълумот учун, Балогун Босния ва Герцеговинага қарши 1/16 финал учрашувида (2:0) ҳимоячи Тарик Мухаремовичнинг оёғига бутсасининг тишлари билан зарба бергани учун тўғридан-тўғри қизил карточка олган эди. Кейинчалик FIFA унинг бир ўйинлик дисквалификациясини тўхтатиб, Бельгияга қарши баҳсда иштирок этишига рухсат берди.