ЖЧ тарихида биринчи марта қизил карточка бекор қилинди

Халқаро футбол федерацияси (FIFA) Интизом қўмитаси АҚШ миллий терма жамоаси ҳужумчиси Фоларин Балогунга нисбатан қўлланилган дисквалификацияни шартли жазога алмаштирди ва унга Бельгияга қарши Жаҳон чемпионати 1/8 финал учрашувида майдонга тушишга рухсат берди. Бу ҳақда “The Athletic” нашри хабар берди.

Балогун 1/16 финалда Босния ва Герцеговинага қарши баҳсда (2:0) ҳимоячи Тарик Муҳаремовичга нисбатан қўпол ҳаракат қилгани учун қизил карточка олган эди. Америкалик ҳужумчи рақибининг оёғининг орқа қисмига бутсасининг тишлари билан зарба берган. 

Амалдаги қоидаларга кўра, у кейинги учрашувни ўтказиб юбориши керак эди.

“FIFA Интизом кодексининг 27-моддасига мувофиқ, бир ўйинлик дисквалификация бир йиллик синов муддати билан алмаштирилади. Агар футболчи ушбу муддат ичида шунга ўхшаш хусусият ва оғирликдаги яна бир қоидабузарликка йўл қўйса, шартли жазо бекор қилинади ва аввалги дисквалификация янги ҳуқуқбузарлик учун белгиланадиган қўшимча жазога қўшимча равишда қўлланилади”, дейилади расмий хабарда.

2025 йилда Португалия миллий терма жамоаси сардори Криштиану Роналду ҳам 2026 йилги Жаҳон чемпионати саралаш босқичида олган қизил карточкасидан кейин шунга ўхшаш қарорга дуч келган эди. У саралашнинг сўнгги учрашувини ўтказиб юборди, кейинчалик эса икки ўйинлик шартли жазо олди. Бу қарор унга узоқ муддатли дисквалификациядан қочиш ва Шимолий Америкада ўтказилаётган Жаҳон чемпионатининг очилиш ўйинларида иштирок этиш имконини берган.

Маълумот учун, 25 ёшли Фоларин Балогун 2023 йилнинг ёзидан буён Франциянинг “Монако” клуби шарафини ҳимоя қилиб келмоқда. У 2026 йилги Жаҳон чемпионатида учта учрашувда майдонга тушиб, учта гол урди ва АҚШ терма жамоасининг турнирдаги энг яхши тўпурари бўлиб турибди.

АҚШ ва Бельгия ўртасидаги 1/8 финал учрашуви эртага, 7 июль куни бўлиб ўтади. Ушбу баҳс ғолиби чорак финалда Испания – Португалия жуфтлиги ғолиби билан куч синашади.