Putin Rossiya va AQSH orasida dallollik qilayotgan “qora shahzoda” bilan gaplashdi

Rossiya Prezidenti Vladimir Putin kecha, 13 mart kuni Saudiya Arabistoni valiahd shahzodasi va Vazirlar kengashi raisi Muhammad bin Salmon Ol Saud bilan telefon orqali muloqot qildi. Bu haqda Kreml matbuot xizmati xabar berdi.

Bildirilishicha, Rossiya Prezidenti Saudiya Arabistoni rahbariyati va xalqini musulmonlar uchun muqaddas Ramazon oyi bilan tabriklab, podshoh Salmon bin Abdulaziz Ol Saudga eng ezgu tilaklarini yetkazgan.

Podshohlikda amalga oshirilgan xalqaro aloqalarni hisobga olgan holda Muhammad bin Salmon Ukraina inqirozini hal qilish muhimligini ta’kidlagan va Rossiya-Amerika munosabatlarini normallashtirishga har tomonlama hissa qo‘shishga tayyorligini bildirgan.

north_east

Zelenskiy Saudiya Arabistoniga bordi (video)

O‘z navbatida, Rossiya Prezidenti Saudiya Arabistonining vositachilik sa’y-harakatlarini yuqori baholagan va unga, xususan, 18 fevral kuni Ar-Riyodda Rossiya va AQSH vakillari o‘rtasida muzokaralar o‘tkazish uchun qulay shart-sharoit yaratilgani uchun minnatdorlik bildirgan.

Shuningdek, “OPEC plus” doirasidagi Rossiya-Saudiya hamkorligining dolzarb masalalari muhokama qilingan. 

“Jahon neft bozori barqarorligini ta’minlash, xomashyo ishlab chiqaruvchilar va iste’molchilar manfaatlari yo‘lida talab va taklif mutanosibligini ta’minlashda ushbu noyob format muhimligi ta’kidlandi”, deyiladi xabarda.

Bundan tashqari, yetakchilar Rossiya va Saudiya Arabistonining “OPEC plus”da o‘z zimmalariga olgan majburiyatlarini bajarish zarurligini ta’kidlagan.

“Tomonlar Rossiya-Saudiya hamkorligining yuqori darajasini mamnuniyat bilan qayd etdilar va uni do‘stona va konstruktiv ruhda yanada rivojlantirishga sodiq ekanliklarini tasdiqladi”, deyiladi xabarda.

Eslatib o‘tamiz, 18 fevral kuni Saudiya Arabistoni poytaxti Ar-Riyod shahrida Amerika va Rossiya delegatsiyalari o‘rtasidagi muzokaralar bo‘lib o‘tgandi. Delegatsiyalarga AQSH Davlat kotibi Marko Rubio va Rossiya Tashqi ishlar vaziri Sergey Lavrov boshchilik qilgandi.

north_east

Trampning odami Putinni ko‘ndirish uchun Rossiyaga bordi

11 mart kuni Saudiya Arabistonining Jidda shahrida AQSH va Ukraina delegatsiyalari o‘rtasidagi muzokaralar bo‘lib o‘tdi. Ukraina delegatsiyasi tarkibida Prezidenti devoni rahbari Andrey Yermak, tashqi ishlar vaziri Andrey Sibiga, Mudofaa vaziri Rustam Umarov va Prezidenti devoni rahbarining o‘rinbosari Pavel Palisa, AQSH delegatsiyasi tarkibida esa Davlat kotibi Marko Rubio va Prezident Donald Trampning milliy xavfsizlik bo‘yicha yordamchisi Maykl Uolts bor edi.

Muzokaralardan so‘ng,  Andrey Yermak agar Rossiya xuddi shunday qadamga rozi bo‘lsa, Ukraina AQSHning 30 kunga o‘t ochishni to‘xtatish haqidagi taklifini qabul qilishga tayyorligini bildirdi. Ukraina Prezidenti Vladimir Zelenskiy ham buni tasdiqlab, AQSHning 30 kunlik otashkesim haqidagi taklifi ijobiy ekanini aytdi.

Kecha, 14 mart kuni Vladimir Putin ham Rossiya AQSHning Ukrainada vaqtinchalik o‘t ochishni to‘xtatish taklifiga rozi ekani, biroq har qanday sulh uzoq muddatli tinchlik va mojaroga sabab bo‘lgan omillarning bartaraf etilishiga olib kelishi kerakligini aytdi. AQSH Prezidenti Donald Trampning aytishicha, Putinning Ukrainada mumkin bo‘lgan o‘t ochishni to‘xtatish haqidagi bayonoti “ko‘p narsani va’da qilishini”, ammo u hali “to‘liq emas”.