Саудиядаги музокараларнинг биринчи босқичи ўз якунига етди

Саудия Арабистонининг Жидда шаҳрида Украина ва АҚШ делегациялари ўртасида бўлиб ўтаётган музокараларнинг биринчи босқичи ўз ниҳоясига етди. Бу ҳақда “Bloomberg” хабар берди.

Маълум қилинишича, биринчи раунднинг ўзи уч соатдан кўпроқ давом этган, сўнгра қисқа танаффус эълон қилинган. Бир неча дақиқадан сўнг музокаралар яна давом эттирилган.

АҚШ Президентининг миллий хавфсизлик бўйича маслаҳатчиси Майкл Уолтц Саудия Арабистонида Украинанинг делегацияси билан ўтказилаётган музокаралар “олдинга силжимоқда” деб айтган.

Украина делегациясига бошчилик қилаётган Президент офиси раҳбари Андрей Ермак Telegram-каналида музокаралар “жудаям конструктив бошланди” ва томонлар “адолатли ва барқарор тинчликни таъминлаш йўлида ишламоқда” деб ёзган.

Қолаверса, АҚШнинг Яқин Шарқ бўйича махсус элчиси Стив Уиткофф музокараларда ҳудудий масалалар, хавфсизлик кафолатлари ва разведка ахборотини алмашиш масалалари муҳокама қилинишини айтган. АҚШ Давлат котиби Марко Рубио Киевнинг Москва билан можаро ечими учун қандай муросаларга боришга тайёрлигини тушуниш зарурлигини таъкидлаган.

Баъзи бир ОАВларга кўра, Украина учрашув давомида қисқа муддатли тинчлик шартларини муҳокама қилади.

Эслатиб ўтамиз, бугун, 11 март куни Украина Президенти Владимир Зеленский ҳам Саудия Арабистонига етиб боргани ҳақида хабар берилганди. Аммо олдинроқ Зеленский АҚШ ва Украина ўртасида бўлиб ўтадиган музокараларда иштирок этмаслигини билдирганди.