Оқ уй Трампнинг одами яна Путин ҳузурига боришини тасдиқлади

north_east

Трампнинг одами россияпараст таклифларни илгари сурмоқда

АҚШ Президентининг махсус вакили Стив Уиткофф шу ҳафта Россия Президенти Владимир Путин билан Россия-Украина можаросини ҳал қилиш бўйича музокаралар ўтказиш учун Россияга боради. Бу ҳақда кеча, 22 апрель куни Оқ уй матбуот котиби Кэролайн Ливитт маълум қилди.

Ливиттнинг қайд этишича, Уиткофф ва АҚШ Президенти Дональд Трамп Украина бўйича музокаралар тўғри йўналишда кетаётганига ишонади.

Аввалроқ “Wall Street Journal” нашри Уиткофф 23 апрель куни Лондонда АҚШ, Украина ва Европа расмийлари учрашувидан кейин Москвага ташриф буюриши мумкинлиги ҳақида хабар берган эди. Украина етакчиси Владимир Зеленский Лондондаги учрашувнинг асосий мавзуси Украинада сўзсиз ўт очишни тўхтатиш бўлишини маълум қилган.

Маълумот учун, Стив Уиткофф жорий йилнинг февраль ойидан бери Владимир Путин билан камида уч марта учрашган.

Эслатиб ўтамиз, 20 апрель куни АҚШ Президенти Дональд Трамп Россия ва Украина ўртасида “шу ҳафтада” келишувга эришишга умид қилишини айтганди. Шу куни Украина етакчиси Владимир Зеленский Россияга фуқаролик инфратузилмасига ҳужумларни 30 кунга “узайтириш имконияти билан” тўхтатишни таклиф қилган эди. Бунга жавобан Россия Президенти Владимир Путин ушбу ташаббусни тўғридан тўғри музокаралар форматига имкон берадиган “саралаш” кераклигини айтди. Зеленский эса Украина оташкесимдан сўнг Россия билан “ҳар қандай форматда” музокара столига ўтиришга тайёр эканини билдирди.