Трамп Россия ва Украина шу ҳафтада сулҳ тузишига умид қилмоқда

Россия ва Украина жорий ҳафтада тинчлик битимини тузиши мумкин. Бу ҳақда АҚШ Президенти Дональд Трамп ўзининг Truth Social ижтимоий тармоғида ёзиб қолдирди.

Трампнинг сўзларига кўра, икки мамлакат орасида тинчлик битими тузилгач, Москва ҳам, Киев ҳам АҚШ билан йирик бизнес юритиш имкониятига эга бўлади.

“Умид қиламанки, Россия ва Украина шу ҳафта келишувга эришади. Шунда ҳар икки томон ҳам гуллаб-яшнаётган ва бойлик орттираётган Америка Қўшма Штатлари билан катта бизнесни бошлайди”, дея ёзган АҚШ раҳбари.

Трамп келишувнинг қандай бораётгани ва бунга қандай қилиб эришиш мумкинлиги ҳақида ҳеч нарсани очиқламаган.

Маълумот учун, АҚШ Давлат котиби Марко Рубио 18 апрель куни Парижда Украина ва Европа етакчилари билан учрашувдан сўнг, яқин кунларда Россия ва Украина ўртасида тинчлик битимига эришишда силжиш бўлмаса, АҚШ воситачилик саъй-ҳаракатларини тўхтатишини билдирганди. Унинг сўзларига кўра, сўнгги уч йил давомида АҚШ Украина тарафида бўлган, ҳозир эса можаронинг тугашини истайди.

Эслатиб ўтамиз, кеча, 20  апрель куни “The Wall Street Journal” нашри АҚШ Украинадаги сулҳ доирасида Запорожье атом электр станцияси атрофидаги ҳудудларга нейтрал мақом беришни ва уларни Вашингтон назоратига ўтказишни таклиф қилганини хабар қилганди. “The New York Post” эса Америка маъмуриятининг юқори мартабали вакилига таяниб, АҚШ жорий ҳафтанинг ўзида Европа ва Киев билан Украинада ўт очишни тўхтатиш бўйича келишувга эришмоқчилиги ҳақида ёзганди. Нашр манбасига кўра, музокараларда АҚШ, Украина, Франция, Германия ва Буюк Британия вакиллари иштирок этади ва янги келишувлар кўриб чиқилади.