Колумбиянинг собиқ президентига ҳукм ўқилди

Колумбиянинг собиқ президенти Альваро Урибе гувоҳларни сохталаштириш ва фирибгарлик айби билан 12 йиллик уй қамоғига ҳукм қилинди. Бу ҳақда “Reuters” хабар берди.

73 ёшли сиёсатчи мамлакат тарихида жиноятда айбланган биринчи собиқ президент бўлди. Шунингдек, унга давлат лавозимларида ишлаш тақиқланган ва 578 минг доллар жаримага тортилган. Ҳукм Колумбияда 2026 йилги президентлик сайловларига бир йилдан камроқ вақт қолганида чиқди.

Ўзининг айбсизлигини таъкидлаган Урибе Боготадаги судьяга суд ҳукми устидан шикоят қилиш ниятида эканини айтган ва бу иш “демократик мухолифат овозини йўқ қилиш”га қаратилганини таъкидлаган.

У 2002 йилдан 2010 йилгача президент бўлиб ишлаган ва чап қанот исёнчиларга қарши курашда ўнг қанот ҳарбийлашган гуруҳлар билан ҳамкорлик қилгани ҳақидаги айбловларга қарамай, Колумбияда машҳур бўлиб қолмоқда. Бу гуруҳларнинг аксарияти кейинчалик инсон ҳуқуқлари поймол қилингани ҳақидаги даъволар туфайли террорчи гуруҳлар деб топилган. Колумбиянинг собиқ президентига нисбатан иш 2018 йилда очилган. Урибе тергов бошиданоқ ўзининг айбсизлигини таъкидлаб келган.

Собиқ президент қарийб 13 йил давом этган гувоҳларни сохталаштириш ишида иккита моддада айбдор деб топилди.

Агентликка кўра, суд ҳукми Колумбиянинг Қўшма Штатлар билан муносабатларига таъсир қилиши мумкин. Давлат котиби Марко Рубио шу ҳафта Урибе чиқарилган ҳукм “радикал судьялар томонидан Колумбия суд тизимини қуроллантириш” эканини айтганди.

Эслатиб ўтамиз, аввалроқ Тунис суди собиқ президент Монсеф Марзукини сиртдан 22 йилга озодликдан маҳрум қилганди. Аргентинанинг собиқ президенти Кристина Киршнер эса коррупция жинояти бўйича 6 йил қамоқ жазосига ҳукм қилинди. Киев суди Украинанинг собиқ президенти Виктор Януковични чегарадан ноқонуний олиб ўтиш ва қочқинликка ундашда айблаб, 15 йилга озодликдан маҳрум қилди. Перу собиқ президенти Ольянта Умала ҳам шунча йилга қамалди. Филиппин полицияси республикани 2016–2022 йилларда бошқарган собиқ президент Родриго Дутертени эса инсониятга қарши жиноятлар бўйича Халқаро жиноий суд (ХЖС) ордери асосида ҳибсга олди.