Собиқ президентининг қасрида махфий омбор топилди (видео)

Парагвайда прокуратура ва полиция ходимлари йирик банк можароси фонида лавозимидан четлатилган мамлакатнинг собиқ президенти Сантьяго Пеньянинг ёзги қасрида яширин омборхонани аниқлади. Омборхона сохта девор ортига яширилган ва Исроилда ишлаб чиқарилган мураккаб хавфсизлик тизимига эга бронланган эшик билан жиҳозланган. Терговчиларга уни оча олмади. Бу ҳақда Парагвайнинг ABC Color газетаси хабар берди. 

Қайд этилишича, тинтув кеча, 8 ноябрь куни Пеньянинг Парагвай пойтахти Асунсьондан тахминан 50 км узоқликда жойлашган Сьерво-Куа туманидаги ёзги қасрида бўлиб ўтган. Терговчилар хоналардан бирида коридорга олиб борадиган яширин эшикни топган. “La Nación” маълумотларига кўра, эшик еттинчи даражали хавфсизлик тизими билан жиҳозланган бўлиб, у бир нечта идентификация усулларини назарда тутади: юз ёки кўзнинг рангдор пардасини таниш, бармоқ изини сканерлаш, PIN-кодни киритиш ва махсус калитлардан фойдаланиш.

Қаср қурилиши тахминан 7,7 миллиард Парагвай гуаранисига (соф 1,23 миллион доллар атрофида) тушган. 2024 йилнинг май ойида Пенья қурилишни молиялаштириш учун Ueno Bank’дан умумий суммаси 500 минг долларга яқин бўлган иккита кредит олган. Улар бўйича ойлик тўловлар тахминан 38 минг долларни ташкил этган – бу унинг президентлик маошидан ортиқ.

Банк инқирози президент импичментига олиб келди

Тинтув ўтган ҳафтада Парагвай Марказий банки томонидан тўловга қобилиятсизлиги сабабли ёпилган Ueno Bank’нинг касодга учраши бўйича олиб борилаётган тергов доирасида ўтказилмоқда. Инқироз оқибатида 3 миллионга яқин мижоз – мамлакат аҳолисининг деярли ярми ўз омонатларидан фойдаланиш имкониятидан маҳрум бўлди. Банкнинг саккиз нафар раҳбари ҳибсга олинди.

Прокуратура Пеньяни ишончни суистеъмол қилиш ва молиявий ресурслардан шахсий манфаатларда фойдаланишда гумон қилмоқда. Тергов талқинига кўра, собиқ президент давлат маблағларини Ueno Bank’га жойлаштиришга кўмаклашган, у ушбу банкни назорат қилувчи гуруҳ акциядори бўлиб 2025 йилгача қолган. Шу билан бирга, банк унинг эгалари билан боғлиқ компанияларга ноқонуний кредитлар ажратган.

Жорий йилнинг 6 ноябрь куни оммавий норозиликлар фонида Парагвай Конгресси 47 ёшли Пеньяни тезлаштирилган импичмент процедураси натижасида лавозимидан четлатди. Эртаси куни у ҳибсга олинди ва Асунсьондаги ҳарбий полк ҳудудига жойлаштирилди.

Президентлик ваколатлари вице-президент Педро Альянага ўтди. У банк инқирозидан жабр кўрганларни у билан боғлиқ жарима ва пенялардан озод қилиш ҳақида фармойиш берди. Янги давлат раҳбарининг маълумотларига кўра, деярли 1,2 миллион омонатчига тахминан 158 миллион доллар қайтариб берилган. Қолган мижозларга тўловлар бир ҳафта давомида давом этиши керак.

Аниқланишича, Пенья лавозимидан четлатилганидан кейин ҳам унинг ёзги қасрини Президент эскорт полкининг ҳарбий хизматчилари қўриқлашда давом этган.