Африкада собиқ президент 22 йил қамоқ жазосига ҳукм қилинди

Тунис суди собиқ президент Монсеф Марзукини сиртдан 22 йилга озодликдан маҳрум қилди. Бу ҳақда “Reuters” хабар берди.

Маълум қилинишича, 79 ёшли Марзуки ҳозирда Парижда сургунда яшамоқда. У суд қарорига муносабат билдирган. 

“Мен бу судьяларга айтмоқчиман: сизларнинг ҳукмларингиз ҳақиқий эмас. Тез орада сизларнинг ўзингизнинг устингиздан суд бўлади. Демократия қайтади”, деган собиқ давлат раҳбари. 

Марзуки 2011 йилдан 2014 йилгача Тунис президенти лавозимида ишлаган. У ҳозирги президент Каис Саидни парламентни ҳокимиятдан четлатиб, авторитар тузум ўрнатишда айблаб келади. Президент Саид эса бу ҳаракатлар мамлакатдаги вазиятни барқарорлаштириш учун зарур бўлганини айтган.

Бу Марзуки ҳақида чиқарилган учинчи ҳукм ҳисобланади.

2021 йилнинг 14 октябрь куни президент Каис Саид бошчилигидаги Тунис ҳукумати Марзукининг дипломатик паспортини бекор қилди. 2021 йилнинг ноябрь ойида эса унга қарши халқаро ҳибсга олиш ордери чиқарилди, у давлат хавфсизлигига таҳдид солганликда айбланди. 2021 йил 23 декабрь куни у сиртқи тарзда 4 йилга қамалди. Суд уни чет элда туриб, Тунис давлати хавфсизлигига зарар етказганликда ва дипломатик зарар келтирганликда айбдор деб топди. Марзуки бу ҳукмни “ноқонуний” деб атади. 

2021 йилнинг 29 декабрь куни у Тунисга қайтиб, амалдаги тузумни ағдаришни мақсад қилганини эълон қилди. 2022 йил январь ойида Марзуки 2019 йилги президентлик сайловларида содир этилган “сайлов қонунбузарликлари” учун судга тортилган 19 юқори мартабали сиёсатчилар қаторида бўлди. Ўша йили у яна сиртқи тарзда 4 йилга озодликдан маҳрум қилинди. 

2024 йилда Марзуки яна сиртқи тарзда 8 йилга қамалди. Бу ҳукм унинг ҳукуматга қарши чиқишлари ва ҳокимиятни ағдаришга даъват сифатида талқин қилинган баёнотларига асосланди.

Маълумот учун, Тунис Африканинг олис шимолидаги давлат. Аҳолиси (2017 йил июл ойидаги аҳолини рўйхатга олиш маълумотларига кўра) 11 403 800 киши, ҳудуди 163 610 км². Пойтахти – Тунис. Расмий тили – араб тили. Бошқарув шакли – президентлик республикаси. Пул бирлиги – Тунис динори. Шимол ва шарқдаги қирғоқларини Ўртаер денгизи сувлари ювиб туради, ғарбда Жазоир, жануби-шарқда Ливия билан чегарадош.

Эслатиб ўтамиз, аввалроқ Аргентинанинг собиқ президенти Кристина Киршнер коррупция жинояти бўйича олти йил қамоқ жазосига ҳукм қилинганди.