Аргентинанинг собиқ президенти қамалди

Аргентинанинг собиқ президенти Кристина Киршнер коррупция жинояти бўйича олти йил қамоқ жазосига ҳукм қилинди. Бу ҳақда TN телеканали хабар берди.

Телеканалга кўра, мамлакатнинг Олий суди илгари чиқарилган ҳукмни ўз кучида қолдирган. Суд коллегияси бир овоздан Киршнерни жинояткор гуруҳ ташкил этишда ва давлат маблағларини ўзлаштириш мақсадида фирибгарлик асосидаги бошқарувда айбдор деб топган. Ушбу маблағлар Санта-Крусдаги миллий инфратузилма лойиҳалари учун ажратилган эди.

Суд шунингдек, Киршнер 2003 йилдан 2015 йилгача тадбиркор Лазаро Баэс манфаатларини кўзлаб иш олиб борганини аниқлаган. Лойиҳалар бўйича нархлар сунъий равишда оширилган ва кўплаб ишлар умуман бажарилмаган. Шунингдек, унга умрбод давлат хизматида ишлаш тақиқланган.

Қайд этилишича, судланувчи қамоқ жазосини уй қамоғига алмаштиришни сўраш ҳуқуқига эга. Бир неча кун олдин Киршнер Буэнос-Айрес провинциясидан депутатликка номзодини қўйишни режалаштираётганини маълум қилган эди.

Маълумот учун, Кристина Киршнер Аргентинанинг 56-президенти бўлиб ишлаган, у 2007 йил 10 декабрдан 2015 йил 10 декабргача бу лавозимни эгаллаган.

Бу давр мобайнида у икки муддат давомида – 2007 ва 2011 йилларда сайланган, биринчи бўлиб тўғридан тўғри сайлов асосида президент бўлган аёл эди.

Эслатиб ўтамиз, аввалроқ Грузиянинг апелляция суди мамлакатнинг собиқ президенти Михаил Саакашвили бўйича чегаранинг ноқонуний кесиб ўтилгани ҳақидаги иш юзасидан оғзаки эшитувни ўтказмасдан, биринчи инстанция судининг ҳукмини ўз кучида қолдирганди. Биринчи инстанция суди унга нисбатан 12 йил 6 ой муддатга қамоқ жазоси тайинлаган. Грузия собиқ президентининг тарафдорлари ва ҳуқуқ ҳимоячилари унга қўйилган айбловларни сиёсий деб ҳисобламоқда. Европа Иттифоқи Михаил Саакашвилини сиёсий маҳбус деб тан олган.