Украинанинг собиқ президенти 15 йиллик қамоқ жазосига ҳукм қилинди

Киев суди Украинанинг собиқ президенти Виктор Януковични чегарадан ноқонуний олиб ўтиш ва қочқинликка ундашда айблаб, 15 йилга озодликдан маҳрум қилди. Тегишли ҳукмни бугун, 28 апрель куни судья Людмила Казмиренко эълон қилди

“Подолск округ суди собиқ президент Виктор Януковични чегарадан ноқонуний равишда одамларни олиб ўтиш ва дезертирга ундаганликда айблаб, ўн беш йилга озодликдан маҳрум қилди. Шунингдек, суд Президент хавфсизлик хизмати раҳбари бўлган Константин Кобзарни ҳам ўн йилга озодликдан маҳрум қилди”, дейди бу ишда давлат айбловини ҳимоя қилган Майдан ишлари бўйича прокурор Денис Иванов. 

Ивановнинг сўзларига кўра, прокурорлар судда Янукович ва Кобзар учун айнан шундай жазони сўраган.

“Суд қўйилган айбловлар асосли ва исботланганига рози бўлиб, уларга максимал даражада жазо тайинлади”, дейди прокурор ҳукмга изоҳ бериб.

Тергов шуни исботладики, собиқ раҳбар 2014 йил 23 февралда Украинани ноқонуний тарк этган ва унинг яқин атрофдагилар ва хавфсизлик ходимларидан яна камида 20 кишини хорижга ўтказишни ташкил қилган.

Қайд этилишича, уларнинг барчаси учта ҳарбий вертолётда назорат-ўтказиш пунктларидан ташқарида учган. Украина расмийларига кўра, Янукович ва унинг шериклари Краснодар ўлкасига йўл олган ва у ердан Анапага учиб кетган. Шундан сўнг, тергов маълумотларига кўра, Янукович Қримдаги Гвардейское ҳарбий аэродромига қайтиб, ҳамроҳлари билан кемада Россия Федерациясига жўнаб кетган. Аввалроқ Януковичнинг ўғли Александр Россия фуқаролигини олгани маълум бўлган эди. 

2019 йил январида Янукович Украинада  давлатга хиёнат ва тажовузкор уруш олиб боришга ёрдам берганликда айбланиб, судланган эди. У 13 йиллик қамоқ жазосига ҳукм қилинди.

Бу Виктор Янукович учун биринчи ҳукм эмас. 2019 йилда у давлатга хиёнатда айбланиб, сиртдан 13 йилга озодликдан маҳрум этилган. 2022 йилда Украина суди Януковичнинг мулкини давлат фойдасига мусодара қилди.