Хитой ва Ҳиндистоннинг Украина ҳақидаги баёноти глобал хавотирларни акс эттиради – Блинкен

Олам

image

Хитой ва Ҳиндистоннинг баёнотлари Россиянинг Украинадаги махсус ҳарбий амалиёти оқибатларидан жаҳон ҳамжамиятининг хавотирини акс эттиради. Бу ҳақда АҚШ Давлат котиби Энтони Блинкен кеча, 16 сентябрь куни Вашингтонда Иордания Ташқи ишлар вазири Айман Ҳусайн Абдуллоҳ ас-Сафадий билан қўшма матбуот анжуманида айтиб ўтди. 

Журналист Блинкендан "Хитой ва Ҳиндистон етакчилари Россия томони билан алоқада бўлган “махсус ҳарбий операция” билан боғлиқ хавотир билдирганликлари" ҳақидаги хабарларга изоҳ беришни сўради.  

“Ўйлайманки, сиз Хитойдан, Ҳиндистондан эшитганларингиз бутун дунёнинг Россиянинг Украинага бўлган тажовузкорлиги оқибатларидан қўрқишини акс эттиради”, дейди Давлат котиби.  

Унинг сўзларига кўра, гап “сайёрадаги мамлакатлар ва одамлар учун”, жумладан, озиқ-овқат хавфсизлиги нуқтаи назаридан ҳам оқибатлар ҳақида кетмоқда. 

“Менимча, бу борада дунё мамлакатлари хавотирларини эшитишингиз мумкин”, дейди Блинкен. У Хитой ва Ҳиндистон қандай баёнотлар ҳақида гапираётганига аниқлик киритмади. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. 


Мақола муаллифи

Теглар

Энтони Блинкен Россия-Украина уруши Украинага босқин

Баҳолаганлар

59

Рейтинг

3

Мақолага баҳо беринг

Дўстларингиз билан улашинг