Исроилни Суриядан олиб чиқиш керак – Жўлоний

north_east

Исроилнинг Суриядаги операцияси жиддий оқибатларга олиб келади – Жўлоний

Туркия Президенти Ражаб Тойиб Эрдўған ва Сурия ўтиш даври президенти Аҳмад аш-Шара (Муҳаммад ал-Жўлоний) кеча, 4 февраль куни Анқарада учрашди ва Исроилни Сурия жанубидаги буфер зонадан олиб чиқиш ва 1974 йилги келишувни амалга ошириш учун халқаро босимнинг аҳамиятини муҳокама қилди. Бу ҳақда музокаралардан сўнг президентлар ўтказган қўшма матбуот анжуманида аш-Шара маълум қилди.

Шара Президент Эрдўғанга таклиф ва самимий меҳмондўстлик учун миннатдорчилик билдирди:

“Сурия халқи миллионлаб қочқинларга эшикларини очган Туркия давлати ва халқининг тарихий позициясини ҳеч қачон унутмайди. Бу ҳамжиҳатлик охирги йилларда, Сурия ва турк қони озодлик курашида аралашиб кетган пайтда чўққисига чиқди”, деди у.

Аш-Шара Туркиянинг Суриянинг ҳозирги маъмуриятининг сиёсий ва иқтисодий муваффақиятини таъминлаш борасидаги саъй-ҳаракатлари Суриянинг мустақиллиги, ҳудудий яхлитлиги ва хавфсизлиги учун катта аҳамиятга эга эканини таъкидлади. У, шунингдек, Сурия ва Туркия ўртасидаги алоқаларнинг кучли тарихий илдизларга эга эканини ва турк маъмурияти ва халқи дуч келган барча қийинчиликларга қарамай, икки давлат ўртасидаги алоқалар мустаҳкамланишда давом этганини қайд этди.

“Шунингдек, биз ушбу муносабатларни барча соҳаларда чуқур стратегик шерикликка айлантиришга қатъий қароримизни тасдиқлаймиз. Бу йўналишда биз гуманитар, иқтисодий, маданий ва ижтимоий соҳаларда қўшма ҳамкорликни бошладик. Шунингдек, биз бошқа муҳим стратегик масалалар, хусусан, минтақадаги хавфсизликка таҳдидларга қарши курашиш бўйича умумий стратегияни ишлаб чиқиш бўйича ҳамкорликда ишлаяпмиз. Бу саъй-ҳаракатлар Сурия ва Туркия учун барқарор хавфсизлик ва барқарорликни таъминлашга қаратилган. Учрашувда Суриянинг мамлакат шимоли-шарқидаги ҳудудий яхлитлигига таҳдидлар ва Исроилни Сурия жанубидаги буфер зонадан олиб чиқиш ва 1974 йилги келишувни амалга ошириш учун халқаро босимнинг аҳамиятини муҳокама қилдик”, деди Суриянинг амалдаги раҳбари.

Шара қўшимча қилдики, томонлар иқтисодиётни қўллаб-қувватлаш ва келажакдаги ривожланишни яхшилаш мақсадида икки мамлакат ўртасидаги савдо ва сармоявий шерикликни, хусусан, инфратузилмани тиклаш соҳасида мустаҳкамлайди.

Шара музокаралар чоғида ҳукм сурган ижобий атмосфера учун Президент Эрдўғанга яна бир бор миннатдорчилик билдирди. У Эрдўғанни энг қисқа вақт ичида Сурияга ташриф буюришга таклиф қилди.

Эслатиб ўтамиз, 2024 йил декабрда Сурияда ҳокимиятни эгаллаган Аҳмад аш-Шара (Абу Муҳаммад ал-Жўлоний) жорий йил 29 январь куни мамлакатнинг ўтиш давридаги президенти деб эълон қилинганди. 2 февраль куни у Саудия Арабистонига илк хорижий ташрифини амалга оширди. Мазкур ташриф доирасида у Ар-Риёдда Саудия Арабистони валиаҳд шаҳзодаси ва Бош вазири Муҳаммад бин Салмон Ол Сауд билан учрашди. 3 февраль куни у Макка шаҳрида Умра зиёратини амалга оширди. Унга Каъба эшиклари ҳам очиб берилди. Аш-Шаранинг 2-хорижий сафари Туркияга бўлди.