Жиноятчилар жирканч ишига яраша жазо олиши керак – Саъдуллаев

Ўзбек медиасида кун мавзусига айланган Хоразмдаги 3 нафар болалар уйи тарбияланувчиларининг амалдорлар томонида зўрланиши бўйича Ёшлар ишлари агентлиги директори, Олий Мажлис Сенати аъзоси Алишер Саъдуллаев чуқур қайғуда эканини билдирди. Унинг қайд этишича, агентлик ҳолат бўйича ўрганиш ишларини бошлаган.

“Уларга нисбатан қилинган бу зўравонлик инсон қадрига ҳам, шаънига ҳам, умуман, инсонийликка тўғри келмайди!  Қизларнинг ижтимоийлашуви ва ҳуқуқий масалаларда қонунда белгиланган ваколатимиз доирасида ёрдам берамиз. Жиноятчилар қилган бу жирканч ишига яраша жазосини олиши керак”, деб ёзган у.

Шунингдек, Саъдуллаев масъул идора ва ташкилотлар зўравонларга нисбатан адолатли қарор қабул қилинишига умид боғлаган. 

Эслатиб ўтамиз, Хоразмдаги Меҳрибонлик уйи тарбияланувчилари (3 нафар қиз) 10 ой давомида вилоят Адлия бошқармаси бошлиғи ва Янгиариқ тумани Фавқулодда вазиятлар бўлими бошлиғи томонидан зўрлаб келинган.  Уларга нисбатан 1,5 йил озодликни чеклаш жазоси тайинланган.

Кейинчалик Адлия вазирлиги ҳолатга муносабат билдириб, ходимнинг  ишдан олингани, эндиликда вазирликка алоқаси йўқ эканини маълум қилди. ФВВ ҳам ўз ходими ўтган йили тергов ишлари олиб борилаётган вақтда эгаллаб турган лавозимидан озод этилганини айтиб чиқди.

Ўзбекистон Президенти Администрацияси раҳбари ўринбосари Комил Алламжонов педофилларга нисбатан кимёвий кастрация жазосини қўллаш вақти келгани ҳақида маълум қилди. Президент Администрацияси Ижро этувчи аппаратининг Коммуникациялар ва ахборот сиёсати бўйича шўба мудири Саида Мирзиёева ушбу ҳолатни “хавотирли” деб атаб, Бош прокуратура синчковлик билан текширув ўтказиши кераклигини таъкидлади.