Зеленский рус аскарларига мурожаат қилди

Украина Президенти Владимир Зеленский россиялик аскарларга мурожаат қилиб, агар улар Украина ҳудудини тарк этса, тирик қолиш имконияти борлигини айтди. Бу ҳақда у Президентнинг Telegram-каналида эълон қилинган видеомурожаатида айтиб ўтган.

Зеленский рус аскарларига рус тилида мурожаат қилган: 

“Россия аскарлари! Сизда омон қолиш имконингиз бор. Қарийб икки ҳафталик қаршиликларимиз сизларга таслим бўлмаслигимизни кўрсатди. Чунки бу бизнинг уйимиз, бу бизнинг оиламиз ва болаларимиз! Биз барча ерларимизни қайтариб, ўлдирилган одамларимиз учун жавоб бермагунимизча курашамиз. Ўлдирилган болаларимиз учун. Сиз ҳали ҳам қутулишингиз мумкин. Агар кетсангиз”.

У россиялик аскарларни ўз қўмондонларига ишонмасликка чақирган.

“Қўмондонларингиз Украинада ҳали ҳам имкониятингиз борлигини айтишса, ишонманг. Бу ерда сизни ҳеч нарса кутмайди. Асирликдан ва ўлимдан ташқари. Сиз бизнинг жонимизни олиб, ўзингизникини берасиз. Ва биз биламизки, сизнинг қўмондонларингиз ҳамма нарсани тушунишади. Биз бу урушни тугатишимиз керак. Биз тинчликка қайтишимиз керак. Уйларимизни тарк этинг, ўз жойингизга боринг”, деган Зеленский.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.