Зеленский Мариуполни қутқариш учун Туркиядан ёрдам кутмоқда

Олам

image

Украина шарқида жойлашган Мариуполь шаҳридаги вазият энг қийинларидан бири бўлиб қолмоқда, Киев шаҳарни қутқариш учун Туркиядан воситачи бўлишини кутмоқда. Бу ҳақда Украина Президенти Владимир Зеленский Буча шаҳрида журналистлар саволларига жавоб бериш чоғида айтиб ўтди.

“Мариуполдаги вазият энг қийинларидан бири. Мен сизга барча сценарийлар ҳақида айтиб беришга ҳаққим йўқ, деб қўрқаман. Туркия билан айнан шу миссияда воситачилик ҳақида гапиряпмиз”, деган Зеленский. 

Украина Президенти, шунингдек, Россия Президенти Владимир Путин билан учрашиш имконияти ҳақида гапирган. 

“Россия учрашув жараёнини қанчалик узоқ чўзса, бу улар учун ҳам, уруш учун ҳам шунчалик ёмон бўлади. Уларнинг қилган ишларини кўриб, гапириш жуда қийин. Агар улар ниманидир ўйлайдиган бўлса, тезроқ ўйласин”, деган Украина раҳбари. 

Маълумот ўрнида, Украина Президенти Владимир Зеленский Киев вилоятининг рус қўшинларидан озод қилинган Буча шаҳрига ташриф буюрган. У гуманитар ёрдам марказига ташриф буюриб, аҳоли билан суҳбатлашган. Зеленский халқаро ва украиналик журналистлар билан ҳам гаплашган. 

Президент, шунингдек, Россия Украинада уруш жиноятлари ва геноцид содир этганини яна бир бор таъкидлаган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

19

Рейтинг

3.3

Мақолага баҳо беринг

Дўстларингиз билан улашинг