Зеленский “Дружба” қувурини таъмирлашга ваъда берди

“Дружба” нефть қувурини таъмирлаш ишлари апрель ойи охиригача нефть ҳайдаш имконини берадиган даражада якунланади. Бу ҳақда бугун, 14 апрель куни Украина Президенти Владимир Зеленский Германия канцлери Фридрих Мерц билан ўтказилган матбуот анжуманида маълум қилди.

Зеленскийнинг сўзларига кўра, таъмирлаш “тўлиқ эмас, лекин фаолият кўрсатиш учун етарли даражада” амалга оширилади. 

“Барча резервуарлар таъмирланмайди, бу узоқ давом этадиган жараён, аммо масала бошқа нарсада. У [қувур – таҳр.] ишлай оладими? Ҳа”, дейди Президент.

У Украинанинг Венгрия билан ҳамкорлигига ишонишини қўшимча қилган. Президентнинг сўзларига кўра, Венгриянинг янги раҳбарияти билан прагматик ёки дўстона муносабатларни “келишувлар, ҳамкорлик ва ўзаро ҳурмат асосида” қуриш мумкин ва бу иккала мамлакатни ҳам фақат кучайтиради.

Зеленский Украина учун Венгриядаги сайлов куни “зулмат устидан нур ғалаба қозонган” кун бўлганини таъкидлаган. Унинг сўзларига кўра, Киев янги бош вазир Петер Мадьяр билан учрашишга “ҳар доим тайёр”.

Маълумот учун, “Дружба” нефть қувурининг жанубий тармоғи орқали Венгрия ва Словакияга нефть етказиб бериш жорий йил январь ойи охирида тўхтаган эди. Киев Украина ҳудудидаги қувурда носозлик юз берганини маълум қилган. Бироқ Будапешт ва Братислава Украинани “энергетик шантаж” ва етказиб беришни атайлаб тўхтатишда айблаган. Зеленский таъмирлаш ишларини бир неча бор кечиктирган.

Эслатиб ўтамиз, 12 апрель куни бўлиб ўтган сайловлар натижаларига кўра Венгрия парламентида конституциявий кўпчиликни (учдан икки қисм ўринни) қўлга киритган Петер Мадьяр ва унинг партияси Украинанинг Европа Иттифоқидан кредит олишига тўсқинлик қилмаслигини маълум қилган эди. Бунгача Виктор Орбан мазкур масалада вето қўйганди.