Юн Сок Ёль озодликка чиқди (видео)

Жанубий Корея прокуратураси суднинг Юн Сок Ёлни озод қилиш тўғрисидаги қарорига шикоят билдирмасликка қарор қилди ва шу тариқа собиқ президентнинг қўйиб юборилишига рухсат берди. Бу ҳақда “Yonhap” хабар берди.

Нашрнинг ёзишича, Юн Сок Ёль тергов изоляторидан чиққан. Изоляторнинг бош дарвозаси олдида уни кўплаб тарафдорлари кутиб олган.

“Аввало, марказий туман судига адолатсизликни тўғрилаш йўлида кўрсатган жасорати ва қатъияти учун миннатдорлик билдираман”, дейилади собиқ президент адвокатлари тарқатган баёнотда.

Юн Сок Ёль ўзининг ёзма мурожаатида ҳам тарафдорларига миннатдорлик билдирган.

Қайд этиш жоиз, бунга қадар Сеул марказий туман суди Юн Сок Ёлнинг ҳибсга олиш қарорини бекор қилиш ва уни озод этиш ҳақида ҳукм чиқарган эди. Суд прокуратура исён бўйича расмий айблов эълон қилишда бир неча соатга кечиккан деб топган. 26 январь куни прокуратура расмий айблов эълон қилгани сабабли президентнинг ҳибсда сақланиш муддати узайтирилган эди. Суд эса прокуратура 26 январь куни соат 9:00 гача айблов эълон қилиши керак эди, кечки пайт эмас, деган қарорга келган. Прокуратура муддат фақат кунлар бўйича ҳисобланиши керак деб ҳисоблаган бўлса, суд ва прокуратура далилларни йўқ қилиш эҳтимоли борасида ҳам турлича фикр билдирган.

Кеча, 7 март куни президент адвокати Сок Дон Хён Юн Сок Ёль прокуратуранинг 7 кун ичида шикоят қилиш имконияти борлиги сабабли озод бўла олмаганини тушунтирди. У, шунингдек, ушбу ҳуқуқий механизм конституцияга зид деб топилганини таъкидлаган.

Эслатиб ўтамиз, 2024 йил 3 декабрь куни Жанубий Корея президенти Юн Сок Ёль мамлакатда ҳарбий ҳолат жорий этган эди. У бу қарорини “конституциявий тартибни ҳимоя қилиш” ва “Шимолий Корея коммунистик кучлари таҳдидидан қочиш” истаги билан изоҳлади.

Ҳарбий ҳолат эълон қилинишига мухолифатдаги Демократик партия етакчиси Ли Же Мён қарши чиқди ва партия аъзоларини парламент биносида тўпланишга чақирди. Кейинчалик парламент бу қарорни бекор қилиш учун овоз берди.

Шундан сўнг, мухолифат президенти истеъфога чиқишга чақирди, Жанубий Корея полицияси эса Юн Сок Ёлга давлат тўнтаришини ташкил этиш айби бўйича тергов бошлади.

Бу орада Жанубий Корея мудофаа вазири истеъфога чиқди ва ҳарбий ҳолат эълон қилиниши аҳолида “ташвиш ва хавотир уйғотгани” учун узр сўради. Шунингдек, президент администрацияси раҳбари ва яна 10 нафар юқори мартабали амалдор лавозимидан четлатилди.

Орадан икки кун ўтиб, Жанубий Корея мухолифат партияси Юн Сок Ёлга нисбатан импичмент жараёнини бошлади. Бироқ овоз бериш амалга ошмади, чунки ҳукмрон партия депутатларининг аксарияти мажлисни бойкот қилди.

Кейинчалик президент халққа мурожаат қилиб, бу қарорни “умидсизликдан” қабул қилганини айтди. Бошқа бир чиқишида эса импичмент бўйича овоз бериш ўтказилмагунча истеъфога чиқмаслигини билдирди. 14 декабрь куни парламент Юн Сок Ёлга импичмент эълон қилиш учун овоз берди, 31 декабрда эса суд унинг ҳибсга олиниши бўйича ордер чиқарди.

Бироқ январь ойи бошида полиция президентни ҳибсга ола олмади, чунки унинг юзлаб тарафдорлари ва хавфсизлик хизмати ходимлари терговчиларни унинг қароргоҳига киритмади. Кўп соатлик қарама-қаршиликдан сўнг, полиция ҳибсга олиш режасидан вақтинча воз кечишга мажбур бўлди. У фақат январь ўрталарида, иккинчи уринишдан сўнг ҳибсга олинди. Январь охирида прокуратура лавозимидан четлатилган президент Юн Сок Ёлга расмий айблов эълон қилди.