Жанубий Кореяда қурилаётган метро линияси қулаб тушди

Бугун, 11 апрель куни Жанубий Кореянинг Кванмён шаҳридаги метро қурилишида туннель қулаб тушди, бунинг оқибатида икки ишчи ғойиб бўлди. Бу ҳақда “Korea JoongAng Daily” хабар берди.

Маълум қилинишича, ҳодиса маҳаллий вақт билан соат 15:40 атрофида, ҳокимият таянч конструкциясидаги ёриқлар туфайли ишларни тўхтатиш ва ишчиларни майдондан эвакуация қилиш тўғрисида қарор қабул қилганидан бир неча соат ўтгач содир бўлган.

Маҳаллий ОАВ маълумотларига кўра, ходимлар эвакуация қилингани ва Янджи (Кванмёнда) ва Хохён (Анянда) чорраҳалари ўртасидаги бир километрга яқин йўл қисми ёпилганига қарамай, икки ишчи билан алоқа ўрнатишнинг иложи бўлмаган – уларнинг қаердалиги номаълумлигича қолмоқда.

Воқеа содир бўлганидан сўнг, йўллар, савдо ва офис биноларига қаттиқ шикаст етган. Икки нафар бедарак йўқолганлардан ташқари қурбонлар ва жабрланганлар йўқ.

Дастлабки маълумотларга кўра, юк кўтарувчи устундаги ёриқлар ҳақидаги биринчи хабарлар тушга яқин келиб тушган.

Авария Илжик-донг туманидаги Sinansan янги метро линияси қурилиш участкасида содир бўлган.

Эслатиб ўтамиз, аввалроқ Доминикан Республикасида тунги клуб томининг қулашидан 98 киши ҳалок бўлганди. Ҳодиса оқибатида яна 146 киши жароҳат олиб, шифохоналарга ётқизилган.