Европа Россия валюта захираси ва олигархларига қарши санкция ваъда қилди
Олам
−
27 Февраль 2022
7792Европа комиссияси Президенти Урсула фон дер Ляйен Украинага тажовуз қилгани учун Россия Федерациясига қарши жорий этиладиган навбатдаги санкциялар пакетини тақдим этди. Бу ҳақда у Twitter саҳифасида маълум қилди.
“АҚШ, Франция, Германия, Италия, Канада ва Буюк Британия билан келишилган ҳолда, мен ЕИ раҳбарларига Россиянинг Украинага бостириб киришига жавобимизни кучайтириш ва Путиннинг уруш машинасини молиялаштириш қобилиятини бўғиш учун янги чораларни таклиф қиламан”, деган фон дер Ляйен.
Ғарб давлатлари биринчи навбатда маълум бир миқдордаги Россия банкларини SWIFT халқаро банклараро тизимидан узиш мажбуриятини олади.
“Бу уларнинг бутун дунё бўйлаб фаолиятини тўхтатади ва Россия экспорти ва импортини самарали равишда блоклайди”, деган у.
Иккинчи чора сифатида Россия Марказий банки активларини фалаж қилиш режалаштирилган.
“Бу уларнинг транзакцияларини музлатиб қўяди. Бу марказий банкнинг ўз активларини тугатишини имконсиз ҳолга келатиради”, деган Европа Иттифоқи раҳбари.
Энг асосийси рус олигархларининг молиявий активларини Европа бозорларида ишлатиши тақиқланади.
“Путин Украинани йўқ қилишга қаратилган йўлни танлади. Лекин у ўз мамлакати келажагини ҳам барбод қилмоқда”, дея таъкидлаган фон дер Ляйен.
Аввалроқ АҚШ Россия Украинага ҳужум қилгани учун расмий Москванинг 643 млрд доллар миқдоридаги давлат захирасини блоклаш устида бош қотираётгани ҳақида хабар берган эдик.
Россиянинг Украинага босқини
Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.
Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.
24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.
Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.
Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.
Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.
Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.
25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.
LiveБарчаси