ЕИ Россияга қарши санкцияларни қайта кўриб чиқиши мумкин

Европа Иттифоқи (ЕИ) кузда Россияга қарши жорий қилинган санкцияларни қайта кўриб чиқиши мумкин. Бу ҳақда Венгрия Ташқи ишлар вазирлиги вакили Тамас Менцер М1 телеканали эфирида айтиб ўтди, деб хабар берди ТАСС.

“Санкциялар [Европада] энергия танқислиги ва нархларнинг сезиларли даражада ошишига олиб келди. Мен бунда [масалада] оптимист эмасман, лекин санкцияларни кузда қайта кўриб чиқилиши мумкин. Ишларнинг ҳақиқий ҳолатини тобора кўпроқ одамлар кўришмоқда. Совуқ келганда ва иқтисодиётни бошқариш зарур бўлганда, ҳақиқат ҳар бир [Европа] мамлакатининг эшигини тақиллатади”, дейди Менцер.

Маълумот учун, Россия Украинага кенг кўламли ҳужум бошлаши ортидан Европа, Шимолий Америка давлатлари, шунингдек, Япония, Австралия ва Янги Зеландия расмий Москвага қарши мислсиз санкциялар жорий қилди. Чекловлар Россия иқтисодитнинг таянчи ҳисобланган энергетика соҳасини ҳам четлаб ўтмади. 

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди.