Янги санкциялар. Британия Россияни фунт стерлингдан ҳам маҳрум қилди

Олам 4904
image

Аввалроқ, Буюк Британия Украиндаги уруш фонида Россияга қарши навбатдаги санкцияларни киритгани ҳақида хабар берган эдик. Мамлакат Ҳукумат янги санкциялар ўз ичига нималарни олишини очиқлади. 

Қайд этилишича, Лондон ўз валютаси – фунт стерлингни Россияга олиб киришни тақиқлаган, шунингдек, расмийлар Европа Иттифоқи давлатларининг банкнотларини Британиядан Россия Федерациясига олиб чиқишга тақиқ қўйган. 

Бундан ташқари, Британияда:

•  кимёвий ва биологик қуроллар билан боғлиқ барча нарсаларни Россияга сотиш, сотиб олиш ёки бериш;

•  самолёт ёқилғисини тўғридан-тўғри ёки билвосита Россига етказиб бериш;

•  Россияда ишлаб чиқарилган, даромад келтирадиган товарларни олиб кириш, сотиб олиш, етказиб бериш;

•  денгиз транспорти соҳасида технологияларни сотиш, узатиш, тақдим этиш тақиқланди.

Қайд этилишича, эълон қилинган чекловларнинг бир қисми нафақат Россия Федерациясига, балки Украинадаги ҳукумат томонидан назорат қилинмайдиган [ДХР ваЛХРлар]га ҳам тегишли.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Юлдуз Абдурашидова
Мақолага баҳо беринг
Баҳолаганлар: 14
Рейтинг: 3.2
t
×