Венгрия ЕИдан Усмонов ва яна икки миллиардерни “қора рўйхат”дан чиқаришни сўраяпти

Венгрия Европа Иттифоқидан уч нафар россиялик тадбиркор – Алишер Усмонов, Петр Авен ва Виктор Рашниковни Европа Иттифоқининг санкциялар рўйхатидан олиб ташлашни сўради. Бу ҳақда кеча, 6 сентябрь куни “Politico” газетаси номи ошкор этилмаган европалик дипломатлар ва расмийларга таяниб хабар берди.

Нашр манбаларига кўра, Венгрия “шунингдек, Европа Иттифоқидан гуманитар ёрдам [кўрсатиш] учун санкцияларда истиснолар [рўйхатини] кенгайтиришни сўраган”. Бу “Европа Иттифоқининг бошқа мамлакатларида Венгрия томони Европа санкцияларида бўшлиқлар яратиш ниятида экани ҳақида хавотир уйғотган. Ваҳоланки Европа Комиссияси қоидаларни кучайтиришга интилмоқда.

Нашрнинг ёзишича, Будапештнинг позицияси “Европа Иттифоқининг бошқа давлатларини ғазаблантирган”. Европа Иттифоқи санкция остидагиларга нисбатан чекловларнинг амал қилиш муддатини 15 сентябргача узайтириши керак. Нашр манбаларига кўра, Венгриянинг илтимоси бугун, 7 сентябрь куни Украинадаги вазиятга бағишланган навбатдаги йиғилишда муҳокама қилинади.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди.