Урушдан мадори қуриётган Украинани тиклашда Италия ҳам ёрдам бериши мумкин

Олам 6301
image

Италия келажакда Украинани қайта тиклашда ёрдам бериши мумкин. Бу ҳақда Италиянинг Украинадаги элчиси Пьер Франческо Дзадзо ANSA агентлигига берган интервьюсида сўз очган

“Италия Европанинг учинчи иқтисодиёти ҳисоблангани ҳамда маълум маънода Украина иқтисодий тизимини тўлдириш имконига эга бўлгани сабабли, мамлакатни қайта тиклаш ҳаракатларида ҳал қилувчи ролни ўйнаши мумкин. Шунингдек, бизни “Confindustria” ва бошқа кўплаб йирик компаниялар билан алоқаларимиз бор. Улар Италияни агросаноат сектори, машинасозлик каби соҳаларда катта салоҳиятга эга мамлакат деб билади”, дейди элчи. 

Аввалроқ, Украина Президенти Владимир Зеленский уруш тугаганидан кейин мамлакатни тиклашда Россия ҳам, Европа давлатлари ҳам иштирок этиши керак, деган фикрни билдирган эди.

У, шунингдек Украинани қайта тиклаш учун камида 600 миллиард доллар керак бўлишини, бироқ бу ҳадли тахминий миқдор эканини айтиб ўтганди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Диёра Абдураҳмoнова
Мақолага баҳо беринг
Баҳолаганлар: 15
Рейтинг: 3.5
t
×