“Урди-ю сурди”. Наманганда Gentra пиёдани уриб кетди (видео)

Кеча, 11 февраль куни Наманган вилояти Наманган шаҳрида Gentra ҳайдовчиси йўлни кесиб ўтаётган пиёдани уриб, воқеа жойидан қочиб кетди. Бу ҳақда вилоят ИИБ Йўл ҳаракати хавфсизлиги бошқармаси хабар берди.

Маълум қилинишича, кеча, 11 февраль куни соат 06:40 ларда номаълум шахс ўзининг бошқарувида бўлган Gentra русумли автомашинасида Наманган шаҳар, Амир Темур кўчасида ҳаракатланиб, йўлни кесиб ўтаётган пиёда Наманган шаҳрида яшовчи, 1958 йилда туғилган фуқарони уриб юбориб, ҳодиса жойидан яширинган. Оқибатда пиёда олган тан жароҳати сабабли воқеа жойида вафот этган.

“Мазкур ҳолат юзасидан Наманган шаҳар ИИБ ҳузуридаги Тергов бўлими томонидан Ўзбекистон Республикаси Жиноят Кодексининг 117-моддаси 2-қисми (Хавф остида қолдириш) ва 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган”, дейилади хабарда.

Қайд этилишича, номаълум ҳайдовчини топиш бўйича ўтказилаётган тезкор қидирув ишлари юзасидан қора рангли Gentra русумли автомашиналар мутахассислар томонидан текширилиб, текширув якунлангандан сўнг рухсат берилмоқда.

“Шу сабабли ижтимоий тармоқ фойдаланувчиларидан одам ўлимига сабабчи бўлиб, жавобгарликдан қутулмоқчи бўлган ҳайдовчини топиш мақсадида ўтказилаётган тезкор қидирув ишларини ва бу борадаги ички ишлар органлари ходимларининг саъй-ҳаракатларини нотўғри талқин қилмасликларини сўраймиз”, дейилади бошқарма хабарида. 

Эслатиб ўтамиз, аввалроқ Тошкент шаҳрининг Шайхонтоҳур туманида Gentra ҳайдовчиси бир неча фуқароларни босиб кетишга уринганди.