Тошкентда “котта боллар”нинг машинаси одамларни босиб кетишга уринди

Тошкент шаҳрининг Шайхонтоҳур туманида Gentra ҳайдовчиси бир неча фуқароларни босиб кетишга уринди. Бу ҳақда пойтахт Йўл ҳаракати хавфсизлиги бошқармаси хабар берди.

Қайд этилишича, ҳолат Шайхонтоҳур туманининг Тахтапул кўчасида соат тахминан 03:20 да юзага келган. Бир неча фуқаро ўзаро жанжаллашиб қолиши оқибатида оқ рангдаги Gentra автомашинасининг ҳайдовчиси транспорт воситасини уларнинг устига қараб ҳайдаган. Тармоқларда тарқалган видеода қасддан уриб юборишга уринишдан сўнг икки киши автомобилнинг олд ойнасига тош отиб, уни синдирганини кўриш мумкин.

ЙҲХБ барча фуқаролар туман ички ишлар бўлимига топширилгани, автомашина эса жарима майдонига жойлаштирилганини маълум қилган. Ҳолат юзасидан Шайхонтоҳур тумани ИИО ФМБ томонидан дастлабки суриштирув ҳаракатлари олиб борилмоқда.

Эслатиб ўтамиз, аввалроқ Самарқанд вилоятида машинасини йўл-патруль инспекторининг устига ҳайдаган ҳайдовчи қамоққа олинганди. Самарқанд шаҳрининг Буюк Ипак йўли кўчасида хизмат фаолиятини олиб бораётган йўл-патруль хизмати ходими томонидан шу йўналиш бўйлаб давлат рақам белгисиз Оnix ҳайдовчисига сезиларли ва ҳуштак ёрдамида тўхташ ишораси берилган. Лекин ҳайдовчи инспекторнинг қонуний талабига бўйсунмасдан, унинг устига ҳайдаб, тан жароҳати етказган ва воқеа жойидан яширинган.