Украинанинг Ўзбекистондаги элчиси миссиясини якунламоқда

Украинанинг Ўзбекистондаги Фавқулодда ва мухтор элчиси Микола Дорошенко Тошкентдаги дипломатик миссиясини якунламоқда. Бу ҳақда у ўзининг Facebook'даги саҳифасида ёзди.

“Украина Президенти Владимир Зеленский дипломатик корпус ротацияси доирасида менинг Ўзбекистон Республикасидаги миссиямни якунлаш тўғрисида қарор қабул қилди. Бу менинг юртим, халқим раҳбариятига билдирилган ишончнинг энг юқори даражаси ва мен буни оқлаш учун бор кучимни сарфладим. Мен чуқур мотивация ва бор кучим билан Украина ва Ўзбекистон ўртасидаги ҳамкорликни ҳар томонлама ривожлантиришга ҳисса қўшдим.

Мен ўз ишимга баҳо қўйиш ҳуқуқини бошқаларга қолдираман, фақат ўзимга ўзим айтаманки, мен қилган ишимдан уялмайман. Мен ватаним учун оғир даврда – уруш даврида давлат манфаатларини ифодалаш ва ҳимоя қилиш шарафига муяссар бўлдим”, деб ёзди элчи.

Шунингдек, у Украина 11 йил олдин оғзаки ҳужумга учрагани, “уруш эълон қилмасдан, унинг ҳудудига ўнлаб йиллар давомида ўзларини ака-ука деб атаганлар аслида Қобил бўлиб чиққани”ни қайд этган.

“Бу ҳақиқат ҳақида гапириш, ўзбек жамиятига ҳақиқатни етказиш, уларга Украина бугун қандай яшаётгани, унинг ўғил-қизлари қандай ва нима учун ҳалок бўлаётганини тушунтириш менинг бурчим эди.

Умид қиламанки, менинг меҳнатим туфайли ўзбек муҳитида ҳақиқат уруғлари кўпроқ униб чиқади. Шунга қарамай, мен бу ҳақиқат учун курашда менинг уруғим униб чиққанини аниқ биламан”, дейди у.

Элчи ҳамкорлиги ва Украинани қўллаб-қувватлагани учун барчага миннатдорлик билдирган, ўзгармас қўллаб-қувватлаш ва ёрдам учун турмуш ўрторғи Наталья Дорошенкога алоҳида раҳмат айтган.

Маълумот учун, Микола Дорошенко 2020 йил июлдан бери Укриананинг Ўзбекистондаги Фавқулодда ва мухтор элчиси сифатида ишлаб келаётганди. У 2020 йил 1 июль куни Ўзбекистоннинг ўша пайтдаги ташқи ишлар вазири Абдулазиз Комиловга ишонч ёрлиқлари нусхаларини тақдим қилган. 2020 йилнинг 16 октябрь куни “Кўксарой” қароргоҳида хорижий давлатларнинг Ўзбекистонга янги тайинланган элчилари қаторида Дорошенко ҳам Президент Шавкат Мирзиёевга ишонч ёрлиқларини топширган. Унинг элчилиги даврида Ўзбекистон бир неча бор Украинага инсонпарварлик ёрдами жўнатди ва украиналик болалар ёз ойларида Ўзбекистондаги лагерларда дам олди.